കഥയിലും അവതരണത്തിലും ഏറെ പുതുമകളുണര്‍ത്തി ‘മറിയം’ പ്രദര്‍ശനത്തിനെത്തുന്നു. ശക്തമായ സ്ത്രീ കഥാപാത്രത്തെ കേന്ദ്രീകരിച്ചുള്ള ഈ സിനിമ ജീവിതത്തില്‍ നാം നേരിടേണ്ടിവരുന്ന കൈപ്പേറിയ അനുഭവങ്ങളെ എങ്ങിനെ തരണം ചെയ്യാം എന്ന സന്ദേശമാണ് നല്‍കുന്നത്.
സാഹചര്യങ്ങള്‍ കൊണ്ടോ വിധിയുടെ ക്രൂരത കൊണ്ടോ ഇരയാക്കപ്പെടുന്ന പെണ്‍ജന്മങ്ങളോട് കരഞ്ഞു തീര്‍ക്കാനുള്ളതല്ല നിങ്ങളുടെ ജിവിതമെന്നും തളര്‍ത്തിയ ജീവിത സാഹചര്യത്തില്‍ നിന്ന് ഉള്‍ക്കൊണ്ട ഊര്‍ജം കൈമുതലാക്കി ശക്തമായ തിരിച്ചുവരവിലൂടെ ജീവിതം വര്‍ണ്ണാഭമാക്കണമെന്നും ചിത്രം ഓര്‍മ്മപ്പെടുത്തുമ്പോള്‍ ജീവിതാനുഭവങ്ങള്‍ക്ക് മുമ്പില്‍ പകച്ചു നില്‍ക്കുന്ന യുവ തലമുറ രണ്ട്കയ്യും നീട്ടി സ്വീകരിക്കുമെന്നാണ് വിലയിരുത്തപ്പെടുന്നത്.
ഉയര്‍ന്ന ജോലി മോഹവുമായി നഗരത്തിലെത്തിയ ഒരു പെണ്‍കുട്ടി നേരിടേണ്ടി വരുന്ന തിക്താനുഭവങ്ങളാണ് കഥയുടെ ഇതിവൃത്തം. മനസ്സിനേറ്റ അഴത്തിലുള്ള മുറിവുകള്‍ പ്രകൃതിയുടെ സാന്ത്വനത്തിലൂടെ ഉണക്കാനാവുമെന്ന കാര്യം സിനിമയിലൂടെ തിരിച്ചറിയാനാവും. വ്യത്യസ്തമായ അവതരണത്തിലൂടെ സിനിമയെ ആകര്‍ഷകമാക്കാന്‍ സംവിധായകര്‍ക്ക് കഴിഞ്ഞിട്ടുണ്ട്.
മൃണാളിനി സൂസന്‍ ജോര്‍ജ്ജ് എന്ന യുവ നടിയാണ് ഇതിലെ കേന്ദ്ര കഥാപാത്രം. മറ്റ് അഭിനേതാക്കളായി ജോസഫ് ചിലമ്പന്‍, കൃസ് വേണുഗോപാല്‍, പ്രസാദ് കണ്ണന്‍, രേഖലക്ഷ്മി, ദേവനന്ദ, വൈഷ്ണവി കല്യാണി, അനിക്‌സ്ബൈജു, ബിനോയ് മേപ്പാറ, അരുണ്‍ചാക്കോ, ബോബിന്‍ ജോയ്, മെല്‍ബിന്‍ ബേബി, നിഷാന്ദ് പത്മനാഭന്‍, അമൃത ആനന്ദ്, വിനീഷ് കണ്ണന്‍, എബി എല്‍ദോ, ജോണി ഇ.വി., സുനില്‍ മുതുപാറ, സെയ്ദ് അസീസ്, അഭിലാഷ് അച്ചന്‍കോവില്‍, വിനോദ് പുളിക്കല്‍, അഖില്‍ സുതന്‍, സെബാസ്റ്റ്യന്‍, ബിന്‍സി ജയിംസ്, ശ്രീജിത്ത് കുമരകം, ചിന്നുമൃദുല്‍, സൈനമറിയം തുടങ്ങിയവരും വേഷമിടുന്നു.
ഇതിനകം തന്നെ 20 ഓളം അവര്‍ഡുകളും കരസ്ഥമാക്കിക്കഴിഞ്ഞ ‘മറിയം’ മലയാള സിനിമാ ചരിത്രത്തില്‍ തന്നെ പുതിയ അധ്യായം രചിക്കുമെന്നാണ് സിനിമാനിരൂപകരുടെ വിലയിരുത്തല്‍.
വിംഗ്സ് ഇന്റര്‍നാഷണല്‍ ഫിലിം ഫെസ്റ്റിവലില്‍ മികച്ച മലയാളചിത്രം, ബെസ്റ്റ്ഫീച്ചര്‍ ഫിലിം, ഏറ്റവും നല്ല നടന്‍, മികച്ച ഛായാഗ്രാഹകന്‍ എന്നീ അവാര്‍ഡുകള്‍ ‘മറിയം’ വാരിക്കൂട്ടിയിട്ടുണ്ട്.
വാലറ്റ് ഇന്റര്‍നാഷണല്‍ ഫിലിം ഫെസ്റ്റിവലില്‍ മികച്ച സംവിധായകനുള്ള ജൂറി അവാര്‍ഡ്, മികച്ച മലയാളചിത്രം, മികച്ച തിരക്കഥ. ബെസ്റ്റ് ആര്‍ട്ട് ഫിലിം, മികച്ച ഛായാഗ്രാഹകനുള്ള അവര്‍ഡ് എന്നിവയും നേടിയെടുത്തു.
തിരുനെല്‍വേലി ഇന്റര്‍നാഷണല്‍ ഫിലിം അവാര്‍ഡ്സില്‍ മികച്ച സംവിധായകനുള്ള ജൂറി അവാര്‍ഡും മികച്ച കഥക്കുമുള്ള അവാര്‍ഡുകള്‍ കരസ്ഥമാക്കി.
ഐ ഇന്‍സിഗ്‌ന ഇന്റര്‍നാഷണല്‍ ഫിലിം ഫെസ്റ്റിവലില്‍ മികച്ച നടനും നടിക്കുമുള്ള അവാര്‍ഡ്, സെല്ലുലോയിഡ് ഇന്റര്‍നാഷണല്‍ ഫിലിം ഫെസ്റ്റിവലില്‍ ബെസ്റ്റ് ഫീച്ചര്‍ ഫിലിമിനുള്ള അവാര്‍ഡ്, വെസ്റ്റ് ബംഗാള്‍ ഇന്റര്‍നാഷണല്‍ ഫിലിംഫെസ്റ്റിവലില്‍ മികച്ച സംവിധായകനുള്ള (ഫീച്ചര്‍ ഫിലിം), ബെസ്റ്റ് ഫീച്ചര്‍ ഫിലിം, മികച്ച ഛായാഗ്രാഹകനുള്ള അവര്‍ഡ് എന്നിവ നേടിയെടുത്തു.
വണ്‍ലീഫ് ഇന്റര്‍നാഷണല്‍ ഫിലിം ഫെസ്റ്റിവലില്‍ മികച്ച സംവിധായകന്‍, മികച്ച നടന്‍, മികച്ച നിര്‍മ്മാതാവ് എന്നിവര്‍ക്കുള്ള അവാര്‍ഡുകള്‍ കരസ്ഥമാക്കി. ഇന്ത്യന്‍ സ്‌ക്രീന്‍ പ്രൊജക്ടിന്റെ ബെസ്റ്റ് ഫീച്ചര്‍ ഫിലിമിനുള്ള അവാര്‍ഡും മികച്ച സംവിധായകന്‍, മികച്ച നിര്‍മ്മാതാവിനുള്ള അവാര്‍ഡുകളും ലഭിക്കുകയുണ്ടായി.
കൂടാതെ 2023ലെ പൈന്‍വുഡ് സ്റ്റുഡിയോയിലെ ലിഫ്റ്റ് ഓഫ് ഫിലിം മേക്കര്‍ സെഷനിലും ബെഹാല ഇന്റര്‍നാഷണല്‍ ഫിലിം ഫെസ്റ്റിവലിലും മിസീന്റേജ് ഇന്റര്‍നാഷണല്‍ ഫിലിം ഫെസ്റ്റിവലിലും ഓഫീഷ്യല്‍ സെലക്ഷനും ലഭിച്ചു കഴിഞ്ഞു.
കഴിഞ്ഞ ദിവസം കട്ടപ്പന ഫെസ്റ്റ് നഗരിയില്‍ നടന്ന ചടങ്ങില്‍ ചിത്രത്തിന്റെ ഓഡിയോ ലോഞ്ചിംഗ് നടന്നു. പ്രശസ്ത സംഗീത സംവിധായകനും ഗായകനുമായ ജാസി ഗിഫ്്റ്റ് ലോഞ്ചിംഗ് നിര്‍വ്വഹിച്ചു. ചടങ്ങില്‍ സംവിധായകര്‍ക്ക് പുറമെ എകെപിഎ ഭാരവാഹികള്‍, ഫ്രണ്ട്സ് ഓഫ് കട്ടപ്പന, സംഗീത സംവിധായകന്‍ വിഭു വെഞ്ഞാറമൂട്, സ്റ്റില്‍ ഫോട്ടോഗ്രാഫര്‍ ജാക്സണ്‍ തോമസ്, അരുണ്‍ ചാക്കോ എന്നിവര്‍ പങ്കെടുത്തു.
എ എം കെ പ്രൊഡക്ഷന്‍സിന്റെ ബാറനില്‍ മഞ്ജുകപൂര്‍ നിര്‍മ്മിക്കുന്ന ‘മറിയം’ നവാഗതരായ ബിബിന്‍ ഷിഹ(ഷിഹ ബിബിന്‍, ബിബിന്‍ ജോയ്) എന്നിവര്‍ ചേര്‍ന്നാണ് സംവിധാനം ചെയ്യുന്നത്. ദമ്പതികളായവര്‍ സംവിധനം ചെയ്യുന്ന അദ്യത്തെ സിനിമയെന്ന പ്രത്യേകതയും മറിയത്തിനുണ്ട്.
ഛായാഗ്രാഹകന്‍- രതീഷ് മംഗലത്ത്, കലാ സംവിധാനം- വിനീഷ് കണ്ണന്‍, എഡിറ്റര്‍- റഷിന്‍ അഹമ്മദ്, സംഗീത സംവിധായകന്‍- വിഭു വെഞ്ഞാറമൂട്, പശ്ചാത്തല സംഗീതം – ഗിരി സദാശിവ്, ഗാനരചന- വിഭു പിരപ്പന്‍കോട്, കളറിസ്റ്റ്- യുഗേന്ദ്രന്‍, എഫക്ട്‌സ്- ഷൈന്‍ ബി. ജോണ്‍, സൗണ്ട് ഡിസൈന്‍- ഷൈന്‍ ബി ജോണ്‍, ചീഫ് അസോസിയേറ്റ് ഡയറക്ടര്‍- സന്ദീപ് അജിത് കുമാര്‍, പ്രൊഡക്ഷന്‍ കണ്‍ട്രോളര്‍- പ്രേമന്‍ പെരുമ്പാവൂര്‍, ഗായകര്‍- വിഭു വെഞ്ഞാറമൂട്, അവനി എസ്. എസ്., പോസ്റ്റര്‍ ഡിസൈന്‍- മനു ഡാവിഞ്ചി, പി.ആര്‍.ഒ- അജയ് തുണ്ടത്തില്‍ എന്നിവരാണ് ചിത്രത്തിന്റെ അണിയറശില്‍പ്പികള്‍.
ലോക്ഡൗണ്‍ കാലത്ത് കുമരകം, പെരുമ്പാവൂര്‍ ഇടുക്കി എന്നിവിടങ്ങളില്‍ ചിത്രീകരിച്ച് മറിയം മാര്‍ച്ച് മൂന്നിനാണ് ചിത്രം തിയറ്ററുകളിലെത്തുക.
Recent Comments