എംഎം കമ്മത്ത്-
കൊച്ചി: തെന്നിന്ത്യന്‍ സൂപ്പര്‍ താരം പ്രഭുദേവയെ നായകനാക്കി ബ്ലൂ ഹില്‍ ഫിലിംസ് പുതിയ ചിത്രം പ്രഖ്യാപിച്ചു. ‘തേര്’, ‘ജിബൂട്ടി’ തുടങ്ങിയ ചിത്രങ്ങള്‍ ഒരുക്കിയ എസ്.ജെ സിനുവാണ് ചിത്രം സംവിധാനം ചെയ്യുന്നത്.
ഫ്‌ളവേഴ്‌സ് ചാനലില്‍ ഹിറ്റ് പരിപാടിയായ ‘ഉപ്പും മുകളും’ എന്ന പരിപാടിയുടെ സംവിധാനത്തിനു ശേഷം മലയാള സിനിമാ രംഗത്ത് അമിത് ചക്കാലക്കലിനെ നായകനാക്കി ‘തേര്’, ‘ജിബൂട്ടി’ എന്നീ രണ്ടു ചിത്രങ്ങള്‍ ഒരുക്കിയ എസ്.ജെ. സിനുവിന്റെ നേതൃത്വത്തില്‍ ഒരുങ്ങുന്ന മൂന്നാമത്തെ ചിത്രമാണിത്.
നൃത്തത്തിനും സംഗീതത്തിനും പ്രാധാന്യമുള്ള ചിത്രമായിരിക്കും ഇത്. ബ്ലൂ ഹില്‍ നൈല്‍ കമ്മ്യൂണിക്കേഷന്റെ ബാന്നറില്‍ ജോബി പി സാമാണ് ചിത്രത്തിന്റെ നിമ്മാണം.
ബ്ലൂ ഹില്‍ ഫിലിംസിന്റെ മൂന്നാമത്തെ പ്രൊഡക്ഷനായ ഈ ചിത്രം ബിഗ്ഗ് ബഡ്ജറ്റ് ചിത്രമായിക്കുമെന്നാണ് അറിയുന്നത്.
‘തേര്’ എന്ന ചിത്രത്തിന്റെ രചന നിര്‍വ്വഹിച്ച ദിനില്‍ പി.കെ. ആണ് ഈ ചിത്രത്തിന്റെയും കഥയും തിരക്കഥയുമൊരുക്കുന്നത്.
ചിത്രത്തിലെ മറ്റു താരങ്ങളെയും അണിയറ പ്രവര്‍ത്തകരെയും കുറിച്ചുള്ള വിവരങ്ങള്‍ ഉടന്‍ പ്രഖ്യാപിക്കും.
ഈ വര്‍ഷം ജൂണ്‍ അവസാനത്തോടെ ഈ ചിത്രത്തിന്റെ ചിത്രീകരണം ആരംഭിക്കും.
