Month: August 2020

പിആര്‍ സുമേരന്‍-
കൊച്ചി : തൃശ്ശൂര്‍ ആസ്ഥാനമായി പ്രവര്‍ത്തിക്കുന്ന മനസ്സ് കലാവേദിയുടെ ഒന്‍പതാമത് ഭരത് മുരളി പുരസ്‌ക്കാരത്തിന് മികച്ച നവാഗത സംവിധായകനായി ‘മുന്തിരിമൊഞ്ചന്‍’ എന്ന ചിത്രം ഒരുക്കിയ വിജിത്ത് നമ്പ്യാരെ തെരഞ്ഞെടുത്തു. സംഗീതത്തിന് പ്രാധാന്യം നല്‍കി പോപ്പുലര്‍ ഫോര്‍മാറ്റില്‍ ചെയ്ത വ്യത്യസ്ഥമായ ചിത്രമാണ് ഇതെന്നും കഥയുമായി ഉപകഥകളുടെ സംയോജനം മികവുറ്റതായി എന്നും അവാര്‍ഡു ജൂറി വിലയിരുത്തി. എം.എ. റഹ്മാന്‍ ചെയര്‍മാനും തിരക്കഥാകൃത്ത് ഷൈലേഷ് ദിവാകരന്‍, ചിത്രകാരന്‍ സുധീഷ് കണ്ടമ്പുള്ളി എന്നിവര്‍ അംഗങ്ങളായ ജൂറിയാണ് പുരസ്‌ക്കാര നിര്‍ണ്ണയം നടത്തിയത്.
10,001 രൂപ പ്രശസ്തി പത്രം, ഫലകം എന്നിവയടങ്ങിയ പുരസ്‌ക്കാരം അടുത്തമാസം (സെപ്റ്റംബര്‍ അവസാനം) തൃശ്ശൂര്‍ സാഹിത്യ അക്കാദമി ഹാളില്‍ വച്ച് സമര്‍പ്പിക്കുമെന്ന് കോഓര്‍ഡിനേറ്റര്‍ എം.സി. രാജനാരായണന്‍, പി.എം. കൃഷ്ണകുമാര്‍, ഉണ്ണി, സുരേന്ദ്രപണിക്കര്‍ എന്നിവര്‍ അറിയിച്ചു.’മുന്തിരി മൊഞ്ചന്‍’ എന്ന ചിത്രത്തിന് ശേഷം സംവിധായകനും സംഗീത സംവിധായകനുമായ വിജിത് നമ്പ്യാര്‍ ചെമ്പൈ വൈദ്യനാഥ ഭാഗവതരുടെ ജീവ ചരിത്രം സിനിമയാക്കാന്‍ ഒരുങ്ങുകയാണ്.. ഇന്ത്യയിലെ മികച്ച ടെക്‌നീഷ്യന്‍മാര്‍ ഒരുമിക്കുന്ന ഈ ചിത്രം ഇപ്പോള്‍ പ്രീ പ്രൊഡക്ഷന്‍ ജോലികള്‍ നടക്കുന്നു.
പ്രശസ്ത പഴയകാല സംഗീത പ്രതിഭ ബി എ ചിദംബരനാഥിന്റെ ശിഷ്യന്‍ കൂടിയാണ് വിജിത്. കണ്ണൂര്‍ പള്ളിക്കുന്ന് സ്വദേശിയാണ്. കൂടുതല്‍ വിവരങ്ങള്‍ക്ക്.

പിആര്‍ സുമേരന്‍-
കൊച്ചി: കോവിഡ്-19 പ്രതിരോധ സന്ദേശമുയര്‍ത്തുന്ന വെബ് സൈറ്റുമായി യുവസംവിധായകന്‍ നിതിന്‍ തോമസ് കുരിശിങ്കല്‍. കോവിഡ് ഭീതിയില്‍ കഴിയുന്നവര്‍ക്ക് ഏറെ ആശ്വാസകരമായ ഒരു പദ്ധതിയുമായിട്ടാണ് ചലച്ചിത്ര പരസ്യചിത്രങ്ങളുടെ സംവിധായകനുമായ നിതിന്‍ തന്റെ പ്രവാസി സുഹൃത്ത്ക്കളായ സിജോ തോമസ്, ടിന്റോതോമസ്, മിജോ ജോസഫ്, ലിബിന്‍ പടമാട്ടുമ്മല്‍ എന്നിവരുടെ തുല്യ പങ്കാളിത്തത്തോടെ പുതിയസംരംഭവുമായി വരുന്നത്. കോവിഡ് ഭീതി മൂലം വീടിന് പുറത്ത് ഇറങ്ങാന്‍ കഴിയാത്തവര്‍ക്ക് ഏറെ പ്രയോജനകരമാണ് നിതിനും കൂട്ടുകാരും ഇപ്പോള്‍ വികസിപ്പിച്ച വെബ്‌സൈറ്റ്. വെബ്‌സൈറ്റ് വഴി കച്ചവടക്കാര്‍ക്ക് അവരുടെ ഉത്പന്നങ്ങള്‍ പരസ്യപ്പെടുത്തുന്നതിനും, അതുവഴി അവരുടെ സേവനങ്ങളും ഓഫറുകളും ജനങ്ങളെ അറിയിക്കാനും സാധിക്കും. വീട്ടില്‍ ഇരുന്ന് നഗരത്തില്‍ പ്രമുഖ സ്ഥാപനങ്ങളിലെ ഓഫറുകള്‍ അറിയാനും അവയുടെ നിലവാരം മനസിലാക്കാനും സാധിക്കും എന്നതാണ് ഈ വെബ്‌സൈറ്റിന്റെ പ്രത്യേകത. വെബ്‌സൈറ്റ് വഴി കോവിഡ് കാലത്തു നഷ്ടമായ കച്ചവടം നിലനിര്‍ത്താനാകും. സാമൂഹികവ്യാപനം ഇല്ലാതെ ജനങ്ങള്‍ക്ക് വീട്ടില്‍ ഇരുന്ന് ഓരോ കടകളിലെയും ഓഫറുകള്‍ അറിഞ്ഞ് വാങ്ങാനും സാധിക്കും. അതുവഴി നഗരത്തില്‍ അനാവശ്യമായ തിരക്ക് ഒഴിവാക്കാനും സാമൂഹിക വ്യാപനം വഴിയുള്ള കോവിഡ് പകര്‍ച്ച ഒരുപരിധിവരെ തടയാനും സാധിക്കുമെന്ന് നിതിന്‍ പറഞ്ഞു. www.94hop.com ന്റെ ഉല്‍ഘടനം വി.ഡി. സതീശന്‍ എം എല്‍.എ., പറവൂരില്‍ നിര്‍വഹിച്ചു. ഈ വെബ്‌സൈറ്റിന്റെ ആദ്യഘട്ടം കൊടുങ്ങലൂര്‍ കേന്ദ്രികരിച്ചായിരിക്കും. ഫ്രാഞ്ചസികള്‍ വഴി കേരളത്തിന്റെ എല്ലാ ഭാഗത്തേക്കും 3 മാസത്തിനുള്ളില്‍ സേവനം വ്യാപിപ്പിക്കും.

എഎസ് ദിനേശ്-
കൊച്ചി: മഹാരാജാസ് ടാക്കീസ് എന്ന ചിത്രത്തിനു ശേഷം ദേവീദാസന്‍ തിരക്കഥയെഴുതി സംവിധാനം ചെയ്യുന്ന പുതിയ ചിത്രമാണ് ‘ഹൃദയം സംസാരിക്കുന്നു’. എംഎ ക്രിയേഷന്‍സിന്റെ ബാനറില്‍ എം പ്രദീപ്, ഡോക്ടര്‍ അജിത്ത് കുമാര്‍ എന്നിവര്‍ ചേര്‍ന്നു നിര്‍മ്മിക്കുന്ന ഈ ചിത്രത്തില്‍ പ്രശസ്ത താരങ്ങള്‍ക്കൊപ്പം പുതുമുഖങ്ങളും അഭിനയിക്കുന്നു. 2002ല്‍ ഗുജറാത്തില്‍ ഉണ്ടായ ഹിന്ദു-മുസ്ലീം കലാപത്തിന്റെ പശ്ചാത്തലത്തില്‍ അവിശ്വസിനീയമായ അനുഭവങ്ങളുടെ കഥ പറയുന്ന ‘ഹൃദയം സംസാരിക്കുന്നു’ എന്ന ചിത്രത്തിന്റെ ഷൂട്ടിംഗ് ചിങ്ങ മാസത്തില്‍ ആരംഭിക്കുന്നു.
വാര്‍ത്ത പ്രചരണം- എഎസ് ദിനേശ്.

പിആര്‍ സുമേരന്‍-
കൊച്ചി: ആമസോണ്‍ പ്രൈമില്‍ സൂപ്പര്‍ ഹിറ്റായി പ്രിയനന്ദനന്‍ ചിത്രം സൈലന്‍സര്‍ പ്രദര്‍ശനം തുടരുന്നു. ഇന്ത്യയിലും,പുറത്ത് 64 രാജ്യങ്ങളിലുമായി സിനിമയ്ക്ക് മികച്ച പ്രതികരണമാണ് ഇപ്പോള്‍ ലഭിക്കുന്നത്. സമീപകാലത്ത് ആമസോണ്‍ പ്രൈമില്‍ പ്രദര്‍ശിപ്പിച്ച ചിത്രങ്ങളില്‍ ഏറ്റവും കൂടുതല്‍ പ്രേക്ഷകര്‍ കണ്ട ചിത്രവും സൈലന്‍സര്‍ ആണ്.
പ്രമുഖ സംവിധായകന്‍ പ്രിയനന്ദനന്‍ ലാലിനെ നായകനാക്കി ഒരുക്കിയ ചിത്രമാണ് സൈലന്‍സര്‍. രാജ്യാന്തര ചലച്ചിത്ര മേളയായ ഐഎഫ്എഫ്‌കെയിലും സൈലന്‍സര്‍ പ്രേക്ഷകശ്രദ്ധ നേടിയിരുന്നു.ബെന്‍സി പ്രൊഡക്ഷന്‍സിന്റെ ബാനറില്‍ ബെന്‍സി നാസറാണ് ചിത്രം നിര്‍മ്മിച്ചത്.
പ്രശസ്ത സാഹിത്യകാരന്‍ വൈശാഖന്റെ ‘സൈലന്‍സര്‍’ എന്ന ജനപ്രീതിയാര്‍ജ്ജിച്ച ചെറുകഥയെ ആധാരമാക്കിയാണ് ഈ സിനിമ. വാര്‍ദ്ധക്യത്താല്‍ ഒറ്റപ്പെട്ട് പോയിട്ടും ജീവിത സാഹചര്യങ്ങളോടു പൊരുതി മുന്നേറുന്ന മൂക്കോടന്‍ ഈനാശുവിന്റെ(ലാല്‍) ജീവിതമാണ് സൈലന്‍സറിന്റെ ഇതിവൃത്തം. കരുത്തിന്റെയും അതിജീവനത്തിന്റെയും പ്രതീകമാണ് മൂക്കോടന്‍ ഈനാശു. ത്രേസ്സ്യ(മീരാ വാസുദേവ്)യാണ് ഈനാശുവിന്റെ ഭാര്യ. മകന്‍ സണ്ണി (ഇര്‍ഷാദ്) ചിത്രത്തില്‍ ഇവര്‍ പ്രധാന കഥാപാത്രങ്ങളെ അവതരിപ്പിക്കുന്നു. പഴയ തലമുറയുടെയും പുതിയ തലമുറയുടെയും അഭിരുചികളും പൊരുത്തക്കേടുകളുമാണ് ചിത്രം ചര്‍ച്ച ചെയ്യുന്നത്. മനുഷ്യജീവിതത്തിലെ സംഘര്‍ഷങ്ങളും സാമൂഹിക യാഥാര്‍ത്ഥ്യങ്ങളുമാണ് ചിത്രം ചര്‍ച്ച ചെയ്യുന്നതെങ്കിലും പ്രേക്ഷകരെ രസിപ്പിക്കുന്ന ഒട്ടേറെ മുഹൂര്‍ത്തങ്ങള്‍ ഒരുക്കുന്ന സിനിമ കുടുംബപ്രേക്ഷകര്‍ സ്വീകരിക്കുമെന്ന് സംവിധായകന്‍ പ്രിയനന്ദനന്‍ ചൂണ്ടിക്കാട്ടുന്നു. നല്ല രീതിയിലുള്ള സമ്പത്തുണ്ടെങ്കിലും വീട്ടുകാര്‍ ഈനാശുവിനെ അകറ്റി നിര്‍ത്തിയിരിക്കുകയാണ്. ഒരു മകനുണ്ടെങ്കിലും അയാളുമായി അത്ര സുഖത്തിലല്ല. ഈനാശുവിന് എല്ലാം അയാളുടെ പഴയ രാജദൂത് സ്‌ക്കൂട്ടറാണ്. അതിലാണ് യാത്ര മുഴുവനും. കുടുംബത്തില്‍ നിന്നുള്ള ഒറ്റപ്പെടലില്‍ ഈനാശു അഭയം കാണുന്നത് കഠിനമായ ശബ്ദത്തോടെ സ്‌ക്കൂട്ടറിലുള്ള സവാരിയാണ്. പ്രായമായവരുടെ ഒറ്റപ്പെടലിന്റെ കടുത്ത വേദനയും സൈലന്‍സര്‍ വരച്ചുകാട്ടുന്നുണ്ട്.
തൃശ്ശൂരിന്റെ പ്രാദേശിക ഭാഷയും സംസ്‌ക്കാരവും ഈ ചിത്രത്തിന്റെ മറ്റൊരു പ്രത്യേകത. പ്രിയനന്ദനന്റെ ‘പാതിരാക്കാല’ത്തിന് തിരക്കഥയും സംഭാഷണവും ഒരുക്കിയ പി.എന്‍ ഗോപീകൃഷ്ണനാണ് സൈലന്‍സിന്റെ തിരക്കഥയും സംഭാഷണവും നിര്‍വ്വഹിച്ചിട്ടുള്ളത്. പ്രിയനന്ദനന്റെ മകന്‍ അശ്വഘോഷനാണ് ചിത്രത്തിന്റെ ക്യാമറ ചലിപ്പിച്ചത്. ലാല്‍, ഇര്‍ഷാദ്, രാമു, ബിനോയ് നമ്പോല, മീരാവാസുദേവ്, സ്‌നേഹാ ദിവാകരന്‍, പാര്‍ത്ഥസാരഥി, ജയരാജ് വാര്യര്‍ എന്നിവരാണ് അഭിനേതാക്കള്‍. കലാസംവിധാനം ഷെബീറലി, പ്രൊഡക്ഷന്‍ കണ്‍ട്രോളര്‍- ഷാജി പട്ടിക്കര, മേയ്ക്കപ്പ്- അമല്‍, വസ്ത്രാലങ്കാരം- രാധാകൃഷ്ണന്‍ മങ്ങാട്, പ്രൊഡക്ഷന്‍ എക്‌സിക്യൂട്ടീവ്- നസീര്‍ കൂത്തുപറമ്പ്, പ്രൊഡക്ഷന്‍ മാനേജര്‍- പ്രേംജി പിള്ള, പശ്ചാത്തല സംഗീതം- ബിജിബാല്‍, സ്റ്റില്‍സ്- അനില്‍ പേരാമ്പ്ര, പി.ആര്‍.ഒ- പി.ആര്‍.സുമേരന്‍, അസോസിയേറ്റ് ഡയറക്ടര്‍- സബിന്‍ കാട്ടുങ്ങല്‍, സംവിധാന സഹായികള്‍- ബിനോയ് മാത്യു, കൃഷ്ണകുമാര്‍ വാസുദേവന്‍, പി. അയ്യപ്പദാസ്, ജയന്‍ കടക്കരപ്പള്ളി.