Month: March 2020

മഹേഷ് മാധവ് കമ്മത്ത്-
കോഴിപ്പോര് ഒരു കോഴിയും രണ്ട് കുടുംബങ്ങളും തമ്മിലുള്ള പോരിന്റെ കഥയാണ് പറയുന്നത്. ചിത്രത്തില്‍ നിഷ്‌കളങ്കമായ ഒരു നാട്ടിന്‍പുറത്തെ പ്രണയവുമുണ്ട്. ചുരുക്കി പറഞ്ഞാല്‍ കോഴിപ്പോര് ഒരു ഫുള്‍ എന്റര്‍ടേയ്‌നറാണ്. നാട്ടിന്‍ പുറങ്ങളില്‍ നാം കണ്ടിട്ടുള്ള ഒരുപാട് സന്ദര്‍ഭങ്ങള്‍ കോര്‍ത്തിണക്കിയാണ് ചിത്രം രസകരമായി ഒരുക്കിയിരിക്കുന്നത്. പ്രണയത്തിനെന്നപോലെ സൗുഹൃദത്തിനും പ്രാധാന്യം നല്‍കിയ ഒരു അടിപൊളി ചിത്രം കൂടിയാണ് കോഴിപ്പോര്. ജിബിറ്റ് ജോര്‍ജിന്റെ കഥയ്ക്ക് ജിനോയ് ജനാര്‍ദ്ദനന്‍ ആണ് തിരക്കഥ ഒരുക്കിയിരിക്കുന്നത്. ഈ ചിത്രത്തിലൂടെ മലയാള സിനിമയിലേക്ക് പുത്തന്‍ താരോദയമായി മാറാനൊരുങ്ങുകയാണ് നവജിത്ത് നാരായണന്‍. ഇന്ദ്രന്‍സ്, പൗളി വില്‍സണ്‍, ജോളി ചിറയത്ത്, പ്രവീണ്‍ കമ്മട്ടിപ്പാടം, കെട്ടിയോളാണ് എന്റെ മാലാഖ എന്ന ചിത്രത്തിലൂടെ എത്തിയ വീണ നന്ദകുമാര്‍ തുടങ്ങിയവര്‍ പ്രധാന കഥാപാത്രത്തെ അവതരിപ്പിച്ചിട്ടുണ്ട്. സംവിധായകരായ ജിബിറ്റ് ജോര്‍ജ്, ജിനോയ് ജനാര്‍ദ്ദനന്‍ തുടങ്ങിയവരും ചിത്രത്തിലെ പ്രധാന കഥാപാത്രങ്ങളെ അവതരിപ്പിക്കുന്നു. ചെറിയൊരു വിഷയം ബന്ധങ്ങളെ എങ്ങനെ വിഷളാക്കുന്നു എന്ന് കാണിച്ചു തരുന്ന ചിത്രമാണ് കോഴിപ്പോര്. ഓരോ സീനിലും വന്നുപോകുന്ന കഥാപാത്രങ്ങളും, സന്ദര്‍ഭങ്ങളും തികച്ചും സാധാരണ നാട്ടിന്‍പുറത്തെ വീടുകളില്‍ കാണുന്നപോലെ ചിത്രീകരിക്കാന്‍ സംവിധായകര്‍ക്ക് സാധിച്ചു. കൊച്ചിയും കിടങ്ങൂരുമെല്ലാം മികച്ച ഫ്രെയിമുകളിലാക്കിയ ഛായാഗ്രാഹകനായ രാഗേഷ് നാരായണന്റെ ചിത്രീകരണ മികവ് എടുത്തു പറയേണ്ടതുതന്നെയാണ്. ബിജിബാലാണ് സംഗീത സംവിധാനം നിര്‍വ്വഹിച്ചിരിക്കുന്നത്. എഡിറ്റിംഗ അപ്പു ഭട്ടതിരി. ജെ പിക് മൂവീസിന്റെ ബാനറില്‍ വി ജി ജയകുമാര്‍ ആണ് ചിത്രം നിര്‍മ്മിച്ചിരിക്കുന്നത്.