വിജയ് സേതുപതിയെ നായകനാക്കി മിഷ്‌കിന്‍ സംവിധാനം ചെയ്യുന്ന ഏറെ പ്രതീക്ഷയോടെ കാത്തിരിക്കുന്ന തമിഴ് ആക്ഷന്‍ ത്രില്ലര്‍ ചിത്രം ‘ട്രെയിന്‍’ 2026 ഡിസംബര്‍ 4ന് ലോകമെമ്പാടുമുള്ള തിയേറ്ററുകളില്‍ റിലീസ് ചെയ്യും. വിജയ് സേതുപതി മിഷ്‌കിന്‍ കൂട്ടുകെട്ടിലുള്ള ചിത്രത്തിനായി ആരാധകരും സിനിമാപ്രേമികളും ഏറെ പ്രതീക്ഷയോടെയാണ് കാത്തിരിക്കുന്നത്.
അന്താരാഷ്ട്ര നിയോനോയര്‍ സിനിമകളുടെ ആഖ്യാനശൈലിയും തീവ്രമായ മനുഷ്യവികാരങ്ങളും സമന്വയിപ്പിക്കുന്നതാണ് മിഷ്‌കിന്റെ സംവിധാനശൈലി. ‘ചിത്തിരം പേസുതടി’ എന്ന ചിത്രത്തിലൂടെ സംവിധാനരംഗത്തെത്തിയ മിഷ്‌കിന്റെ ശ്രദ്ധേയമായ ഹിറ്റുകളാണ് ‘പിസാസു’, ‘തുപ്പറിവാളന്‍’, ‘സൈക്കോ’ തുടങ്ങിയ ചിത്രങ്ങള്‍. സംവിധായകനെന്ന നിലയില്‍ മാത്രമല്ല, മികച്ച നടന്‍ എന്ന നിലയിലും അദ്ദേഹം ശ്രദ്ധേയനാണ്. ‘സൂപ്പര്‍ ഡീലക്‌സ്’, ‘മാവീരന്‍’, ‘ലിയോ’ തുടങ്ങിയ ചിത്രങ്ങളിലെ പ്രധാന വേഷങ്ങളിലൂടെ അഭിനയരംഗത്തും മിഷ്‌കിന്‍ തന്റെ സാന്നിധ്യം തെളിയിച്ചിട്ടുണ്ട്.
കലൈപ്പുലി എസ്. താണു, വി ക്രിയേഷന്‍സിന്റെ ബാനറിലാണ് ‘ട്രെയിന്‍’ നിര്‍മ്മിക്കുന്നത്. ‘കണ്ടുകൊണ്ടേന്‍ കണ്ടുകൊണ്ടേന്‍’, ‘കാക്ക കാക്ക’, ‘തുപ്പാക്കി’, ‘കബാലി’ തുടങ്ങി വിവിധ കാലഘട്ടങ്ങളിലും വ്യത്യസ്ത വിഭാഗങ്ങളിലുമായി നിരവധി ബ്ലോക്ക്ബസ്റ്റര്‍ ചിത്രങ്ങള്‍ നിര്‍മ്മിച്ചിട്ടുള്ള പ്രമുഖ നിര്‍മ്മാതാവാണ് കലൈപ്പുലി എസ്. താണു. ധനുഷ്, വെട്രിമാരന്‍ തുടങ്ങിയ പ്രമുഖ താരങ്ങളുമായും സംവിധായകരുമായും അദ്ദേഹം സഹകരിച്ചിട്ടുണ്ട്. വെട്രിമാരന്‍ സംവിധാനം ചെയ്യുന്ന ‘അരസന്‍’ ആണ് അദ്ദേഹത്തിന്റെ പ്രധാനപ്പെട്ട വരാനിരിക്കുന്ന ചിത്രങ്ങളിലൊന്ന്.
മിഷ്‌കിന്റെ പതിവ് സിനിമാശൈലിയുടെ പ്രത്യേകതകള്‍ ഉള്‍ക്കൊള്ളുന്ന തീവ്രമായ ഒരു ത്രില്ലറായിരിക്കും ‘ട്രെയിന്‍’ എന്നാണ് പ്രതീക്ഷിക്കുന്നത്. ചിത്രത്തിന് സെന്‍സര്‍ ബോര്‍ഡിന്റെ U/A സര്‍ട്ടിഫിക്കറ്റ് ലഭിച്ചിട്ടുണ്ട്.
വിജയ് സേതുപതിക്കൊപ്പം ശ്രുതി ഹാസന്‍, നാസര്‍, യുകി സേതു, നരേന്‍, കെ. എസ്. രവികുമാര്‍, സമ്പത്ത് രാജ്, കലൈയരശന്‍, ഇറ ദയാനന്ദ്, അജയ് രത്‌നം, വിന്‍സെന്റ് അശോകന്‍ തുടങ്ങിയ പ്രമുഖ താരങ്ങളും ചിത്രത്തില്‍ അണിനിരക്കുന്നു.
മിഷ്‌കിന്‍ തന്നെയാണ് ചിത്രത്തിന്റെ സംഗീതസംവിധാനം നിര്‍വഹിച്ചിരിക്കുന്നത്. ഫൗസിയ ഫാത്തിമയാണ് ഛായാഗ്രഹണം. വിജയ് സേതുപതിയുടെ പ്രകടനവും മിഷ്‌കിന്റെ വ്യത്യസ്തമായ ആഖ്യാനശൈലിയും ഒത്തുചേരുന്ന ‘ട്രെയിന്‍’ ഈ വര്‍ഷത്തെ ഏറെ പ്രതീക്ഷയുള്ള തമിഴ് ചിത്രങ്ങളിലൊന്നാണ്.
ചിത്രത്തിന്റെ കേരളത്തിലെ വിതരണാവകാശം ഐഎംപി ഫിലിംസ് സ്വന്തമാക്കി. നേരത്തെ വിജയ് ചിത്രം ‘ജനനായകന്‍’, സൂര്യ ചിത്രം ‘കറുപ്പ്’ എന്നിവ കേരളത്തിലെ പ്രേക്ഷകരിലേക്ക് എത്തിച്ചതും ഐഎംപി ഫിലിംസാണ്. ആസിഫ് അലി നായകനാകുന്ന ‘കോട്ടയം ബെല്‍റ്റ്’ ആണ് വരാനിരിക്കുന്ന ഐഎംപിയുടെ മലയാള ചിത്രം.
ആകര്‍ഷകമായ പ്രമേയം, ശ്രദ്ധേയമായ താരനിര, മിഷ്‌കിന്റെ വ്യത്യസ്തമായ ചലച്ചിത്രാവിഷ്‌കാരം എന്നിവയുമായി ‘ട്രെയിന്‍’ 2026 ഡിസംബര്‍ 4ന് ലോകമെമ്പാടുമുള്ള തിയേറ്ററുകളിലെത്തും.
Online PR – CinemaNewsAgency.Com
