മഹേഷ് മാധവ് കമ്മത്ത്-
കയ്യിലൊരു പ്ലേറ്റും മടിയിലൊരു ലാപ്ട്ടോപ്പോ മൊബൈലോ മുന്നിലൊരു ടിവിയോ ഇല്ലെങ്കില് ചോറിറങ്ങാത്തവരാണ് ഇന്നത്തെ മലയാളികളില് ഭൂരിഭാഗവും. പ്രഭാതഭക്ഷണമാകട്ടെ അത്താഴമാകട്ടെ, സ്ക്രീനില് കണ്ണും നട്ട് ഭക്ഷണം കഴിച്ചാലേ പലര്ക്കും വയറും മനസ്സും നിറയൂ എന്ന അവസ്ഥയാണ്. എന്നാല് ഒറ്റനോട്ടത്തില് രസകരമെന്നു തോന്നുന്ന ഈ ശീലം നമ്മളറിയാതെ ശരീരത്തിന് വലിയ പണിയാണ് തരുന്നത്.
ടിവിയിലോ ഫോണിലോ ലാപ്ട്ടോപ്പിലോ ശ്രദ്ധ മുഴുകിയിരിക്കുമ്പോള് വയറു നിറഞ്ഞെന്ന സൂചന തലച്ചോറിന് ലഭിക്കാന് വൈകുന്നു. ഇതുമൂലം ശരീരത്തിന് ആവശ്യമുള്ളതിനേക്കാള് കൂടുതല് ഭക്ഷണം അറിഞ്ഞോ അറിയാതെയോ നാം അകത്താക്കും. കൂടാതെ, സാധാരണഗതിയില് 10 അല്ലെങ്കില് 15 മിനിറ്റു കൊണ്ട് കഴിച്ചു തീര്ക്കാവുന്ന ഭക്ഷണം, സ്ക്രീനിലേക്ക് നോക്കിയിരിക്കുമ്പോള് അര മണിക്കൂറിലേക്കോ ഒരു മണിക്കൂറിലേക്കോ നീണ്ടുപോകാനും ഇത് വഴിവെക്കുന്നു.
കുട്ടികളില് ഈ ശീലം വളര്ത്തുന്നത് അതിലും അപകടമാണ്. ഫോണില് വീഡിയോ കാണിക്കാതെ കുഞ്ഞുങ്ങള്ക്ക് ഭക്ഷണം കൊടുക്കാനാവില്ലെന്ന അവസ്ഥ പല വീടുകളിലുമുണ്ട്. ചെറുപ്പത്തിലേ ഇങ്ങനെ ശീലിപ്പിച്ചാല്, പിന്നീട് സ്ക്രീനില്ലാതെ ഒരടി പോലും മുന്നോട്ടു പോകാന് പറ്റാത്ത മാനസികാവസ്ഥയിലേക്ക് കുട്ടികള് മാറും. അതുകൊണ്ട്, ഇനി ഭക്ഷണം കഴിക്കുമ്പോള് ഫോണും ടിവിയും മാറ്റിവച്ച്, ഭക്ഷണത്തിന്റെ രുചിയറിഞ്ഞ് ആസ്വദിച്ചു കഴിക്കാന് ശീലിക്കാം.
ഭക്ഷണം കഴിക്കുമ്പോള് തലച്ചോറിലെ ലെപ്റ്റിന് (Leptin) എന്ന ഹോര്മോണാണ് വയര് നിറഞ്ഞു എന്ന സന്ദേശം നല്കുന്നത്. നമ്മള് ഭക്ഷണത്തില് മാത്രം ശ്രദ്ധ കേന്ദ്രീകരിക്കുമ്പോള്, ഈ സന്ദേശം ഏകദേശം 15-20 മിനിറ്റിനുള്ളില് കൃത്യമായി തലച്ചോറിലെത്തും.
എന്നാല് ഫോണോ ടിവിയോ നോക്കിയിരിക്കുമ്പോള് തലച്ചോറിന്റെ ശ്രദ്ധ പൂര്ണ്ണമായും ആ ദൃശ്യങ്ങളിലായിരിക്കും.
വയര് നിറഞ്ഞെന്ന സിഗ്നല് തലച്ചോറിന് ലഭിക്കാന് വൈകുകയും, ശരീരത്തിന് ആവശ്യമായതിനേക്കാള് കൂടുതല് കലോറി നമ്മള് അറിയാതെ കഴിച്ചുതീര്ക്കുകയും ചെയ്യുന്നു.
ദീര്ഘകാലം ഇത് തുടരുന്നത് ശരീരത്തില് കൊഴുപ്പ് അടിയാനും, ഇന്സുലിന് റെസിസ്റ്റന്സിനും (Insulin Resistance) വഴിവെക്കുന്നു.
ദഹനം ആരംഭിക്കുന്നത് വായില് നിന്നാണ്. ഭക്ഷണത്തിന്റെ കാഴ്ച, മണം, രുചി എന്നിവ അനുഭവപ്പെടുമ്പോഴാണ് വായില് ആവശ്യത്തിന് ഉമിനീരും (Saliva) വയറ്റില് ദഹനരസങ്ങളും (Digestive enzymes) ഉത്പാദിപ്പിക്കപ്പെടുന്നത്.
സ്ക്രീനിലേക്ക് നോക്കിയിരിക്കുമ്പോള് ഭക്ഷണം ശരിയായി ചവച്ചരയ്ക്കാന് മറന്നുപോകുന്നു.
ശരിയായി ദഹിക്കാത്ത ഭക്ഷണം വയറ്റില് എത്തുമ്പോള് അസിഡിറ്റി, ഗ്യാസ്, നെഞ്ചെരിച്ചില്, മലബന്ധം എന്നിവ ഉണ്ടാകാനുള്ള സാധ്യത വര്ദ്ധിക്കുന്നു.
ഭക്ഷണം കഴിക്കുക എന്നത് വയര് നിറയ്ക്കല് മാത്രമല്ല, മനസ്സിന് സന്തോഷം നല്കുന്ന ഒരു അനുഭവം കൂടിയാണ്.
സ്ക്രീന് ഉപയോഗിക്കുമ്പോള് ഭക്ഷണത്തിന്റെ യഥാര്ത്ഥ രുചിയോ മണമോ ആസ്വദിക്കാന് സാധിക്കാതെ വരുന്നു.
ഫോണ് അല്ലെങ്കില് ടിവി കണ്ടാല് മാത്രമേ വിശപ്പ് തോന്നൂ അല്ലെങ്കില് ഭക്ഷണം കഴിക്കാന് പറ്റൂ എന്ന രീതിയില് തലച്ചോര് ശീലിക്കപ്പെടുന്നു.
കുട്ടികളില് ചെറുപ്പത്തിലേ ഈ ശീലം വളര്ത്തിയാല് ഉണ്ടാകുന്ന പ്രത്യാഘാതങ്ങള് വളരെ വലുതാണ്.
ശ്രദ്ധ വീഡിയോയിലായതിനാല് കുട്ടി ഭക്ഷണം ചവച്ചരക്കാതെ വേഗത്തില് വിഴുങ്ങാന് ശ്രമിക്കുന്നു. ഇത് തൊണ്ടയില് കുടുങ്ങാനുള്ള സാധ്യത ഉണ്ടാക്കുന്നു.
കുട്ടി എന്താണ് കഴിക്കുന്നത് എന്ന് തിരിച്ചറിയുന്നില്ല. കൃത്യമായ വിശപ്പറിഞ്ഞ് കഴിക്കാത്തതിനാല് പോഷകാഹാരക്കുറവോ അമിതവണ്ണമോ ഉണ്ടാകാം.
കുടുംബത്തോടൊപ്പം ഇരുന്ന് സംസാരിച്ചു കഴിക്കുന്ന ശീലം ഇല്ലാതാകുന്നതോടെ കുട്ടികളില് ആശയവിനിമയ ശേഷിയും കുടുംബബന്ധങ്ങളുടെ ഊഷ്മളതയും കുറയുന്നു.
ഈ ശീലം മാറ്റിയെടുക്കാന് ചില ലളിതമായ വഴികള്:
ഊണുമേശയിലോ ഭക്ഷണം കഴിക്കുന്ന സ്ഥലത്തോ ഫോണ്, ലാപ്ടോപ്പ്, ടിവി എന്നിവ പൂര്ണ്ണമായും ഒഴിവാക്കുക.
ഓരോ വിഴുങ്ങുമ്പോഴും ഭക്ഷണത്തിന്റെ രുചിയും മണവും ശ്രദ്ധിച്ച്, നന്നായി ചവച്ചരച്ച് കഴിക്കുക.
ദിവസത്തില് ഒരു നേരമെങ്കിലും കുടുംബാംഗങ്ങള് ഒന്നിച്ച് ഇരുന്ന് വിശേഷങ്ങള് പങ്കുവെച്ച് ഭക്ഷണം കഴിക്കാന് സമയം കണ്ടെത്തുക.
മുതിര്ന്നവര് ആദ്യം ഭക്ഷണം കഴിക്കുമ്പോള് ഫോണ് മാറ്റിവെക്കുക. കുട്ടികളോട് ഭക്ഷണത്തിന്റെ നിറങ്ങള്, ആകൃതികള്, രുചികള് എന്നിവയെക്കുറിച്ച് സംസാരിച്ച് ഭക്ഷണം നല്കുക.
