ലോകത്ത് മൊബൈല് ഫോണ് ഉല്പ്പാദനത്തില് രണ്ടാം സ്ഥാനത്തുള്ള ഇന്ത്യ, സാംസങ്, ഷവോമി, വിവോ തുടങ്ങിയ വിദേശ ബ്രാന്ഡുകള്ക്ക് പകരം സ്വന്തമായി ആഗോളതലത്തില് ശ്രദ്ധിക്കപ്പെടുന്ന ഒരു സ്മാര്ട്ട്ഫോണ് ബ്രാന്ഡ് നിര്മ്മിക്കാന് ഒരുങ്ങുകയാണ്.
നിലവില് ഇന്ത്യയില് ഉപയോഗിക്കുന്ന 99.2% മൊബൈല് ഫോണുകളും രാജ്യത്തുതന്നെ നിര്മ്മിക്കുന്നവയാണെങ്കിലും, വിദേശ കമ്പനികളുടെ കടുത്ത മത്സരം കാരണം ലാവ, മൈക്രോമാക്സ് തുടങ്ങിയ ഇന്ത്യന് ബ്രാന്ഡുകള്ക്ക് വലിയ വിപണി വിഹിതം നേടാന് സാധിച്ചിരുന്നില്ല. ഈ വിടവ് നികത്താനും സ്വന്തം ബ്രാന്ഡുകളെ വളര്ത്താനുമായി കേന്ദ്ര സര്ക്കാര് 62,500 കോടി രൂപയുടെ പുതിയ മൊബൈല് ഫോണ് നിര്മ്മാണ പദ്ധതി (Mobile Phone Manufacturing Scheme) പ്രഖ്യാപിച്ചിട്ടുണ്ട്.
കേവലം ഫോണുകള് അസംബിള് ചെയ്യുന്നതിന് പകരം, ഫോണുകളുടെ ഡിസൈന്, ഗവേഷണം, ഇന്ത്യന് ഉടമസ്ഥതയിലുള്ള ബ്രാന്ഡുകള് എന്നിവ പ്രോത്സാഹിപ്പിക്കുകയാണ് ഈ പദ്ധതിയിലൂടെ ലക്ഷ്യമിടുന്നത്. ഇതിന്റെ ഭാഗമായി 2027 പകുതിയോടെ ഇന്ത്യയുടെ സ്വന്തം ശക്തമായ ഒരു മൊബൈല് ബ്രാന്ഡ് പുറത്തുവരുമെന്ന് ഇലക്ട്രോണിക്സ് മന്ത്രി അശ്വിനി വൈഷ്ണവ് വ്യക്തമാക്കിയിട്ടുണ്ട്.
പദ്ധതിയുടെ ആനുകൂല്യം ലഭിക്കുന്ന കമ്പനിക്ക് 51 ശതമാനത്തിലധികം ഇന്ത്യന് ഉടമസ്ഥതയും, ഇന്ത്യയില് കേന്ദ്രീകരിച്ചുള്ള ഗവേഷണ ശേഷിയും ഉണ്ടായിരിക്കണം. ലാവ പോലെയുള്ള നിലവിലുള്ള ഇന്ത്യന് കമ്പനികള്ക്കും ഡിക്സണ് പോലെയുള്ള വലിയ നിര്മ്മാണ പങ്കാളികള്ക്കും ഈ പുതിയ നയം വലിയ കരുത്താകുമെന്നാണ് വിലയിരുത്തപ്പെടുന്നത്.
