എടിഎമ്മുകളില് തടസ്സമില്ലാതെ പണം ലഭ്യമാണെന്ന് ഉറപ്പാക്കാന് ബാങ്കുകള്ക്ക് റിസര്വ് ബാങ്കും ധനമന്ത്രാലയവും നിര്ദേശം നല്കി. ഒക്ടോബര് 15 മുതല് 2,000 രൂപയ്ക്ക് മുകളിലുള്ള എടിഎം ഇടപാടുകള്ക്ക് ഫീസ് ഈടാക്കാന് തീരുമാനിച്ച പശ്ചാത്തലത്തിലാണ് ഈ നടപടി. നിരക്ക് വര്ധന നിലവില് വരുന്നതോടെ ആളുകള് ഡിജിറ്റല് മാര്ഗങ്ങളില് നിന്ന് വീണ്ടും പണമിടപാടുകളിലേക്ക് തിരിഞ്ഞേക്കുമെന്ന ആശങ്ക നിലനില്ക്കുന്നുണ്ട്. എടിഎം ശൃംഖല ചുരുങ്ങിക്കൊണ്ടിരിക്കുന്ന നിലവിലെ സാഹചര്യത്തില് ഇത് വലിയ വെല്ലുവിളിയായേക്കാം.
എന്നാല്, ഡിജിറ്റല് പേയ്മെന്റുകള് ജനങ്ങളുടെ ശീലമായി മാറിയതിനാല് ഉപഭോക്തൃ സ്വഭാവത്തില് പെട്ടെന്ന് വലിയ മാറ്റമുണ്ടാകില്ലെന്നും വിലയിരുത്തലുണ്ട്. ഡിജിറ്റല് ഇടപാടുകള് വര്ധിച്ചതോടെ എടിഎം വഴിയുള്ള ഉപയോഗം കുറയുകയും, ശാഖകളില് നിന്ന് അകന്നുള്ള നിരവധി എടിഎമ്മുകള് ബാങ്കുകള് അടച്ചുപൂട്ടുകയും ചെയ്തിരുന്നു. അതേസമയം ബാങ്ക് ശാഖകളോട് ചേര്ന്നുള്ള എടിഎമ്മുകളുടെ എണ്ണത്തില് വര്ധനവുണ്ടായിട്ടുണ്ട്.
സ്ഥിതിവിവരക്കണക്കുകള് പ്രകാരം എടിഎം പിന്വലിക്കലിന്റെ അളവിലും മൂല്യത്തിലും കാര്യമായ ഇടിവാണ് രേഖപ്പെടുത്തിയത്. 2023 സാമ്പത്തിക വര്ഷത്തില് 32.8 ലക്ഷം കോടി രൂപയായിരുന്ന എടിഎം പിന്വലിക്കല് മൂല്യം 2026 സാമ്പത്തിക വര്ഷത്തോടെ 28.5 ലക്ഷം കോടി രൂപയായി കുറഞ്ഞു. അതേസമയം, ഡിജിറ്റല് ഇടപാടുകള് സജീവമായി തുടരുമ്പോഴും വിപണിയിലുള്ള കറന്സിയുടെ അളവ് വര്ധിക്കുന്നുണ്ട്. 2026 ഓഗസ്റ്റ് അവസാനത്തെ കണക്കനുസരിച്ച് വിപണിയിലെ കറന്സി വിനിമയം 12.5 ശതമാനം വര്ധിച്ച് 42.86 ലക്ഷം കോടി രൂപയിലെത്തി.
