ഗണിതശാസ്ത്ര പ്രതിഭ കൊണ്ട് ലോകത്തെ ഞെട്ടിച്ച ശകുന്തളാ ദേവിയാകാനൊരുങ്ങുന്നതിന്റെ ആവേശത്തിലാണ് വിദ്യാബാലന്. ശകുന്തളാ ദേവിയാകുന്നതിന്റെ ആഹ്ലാദം തന്റെ ഇന്സ്റ്റഗ്രാം പേജിലൂടെയും അവര് പങ്കുവെച്ചത്. തുമാരി സുലുവുലെ വേഷത്തിനു ശേഷം കാത്തിരുന്നു കിട്ടിയ ശകുന്തളാ ദേവിയെ കഴിവിന്റെ പരമാവധി മികച്ചതാക്കുമെന്നാണ് വിദ്യ പറയുന്നത്. ഇന്ത്യയിലെ ഒരു ചെറിയ ഗ്രാമത്തില് നിന്നുള്ള പെണ്കുട്ടി ലോകം കീഴടക്കി ഹ്യൂമന് കംമ്പ്യൂട്ടറായ കഥ പറയാന് ഞാന് വരുന്നുവെന്നും അവര് കുറിച്ചു.
തന്റെ അഞ്ചാം വയസില് 18 വയസ് പ്രായമുള്ളവര് ചെയ്യേണ്ട കണക്കുകള് ഞൊടിയിടയില് ചെയ്താണ് ശകുന്തള ദേവി ശ്രദ്ധേയയായത്. പ്രതിബന്ധങ്ങളെ തരണം ചെയ്ത് അവര് നേടിയ വിജയം രാജ്യത്തെ എല്ലാ സ്ത്രീകള്ക്കും പ്രചോദനമാണെന്നും വിദ്യ പറഞ്ഞു. അനു മേനോനാണ് ചിത്രം സംവിധാനം ചെയ്യുന്നത്. കഥ കേള്ക്കുമ്പോള് വിദ്യ ഭയങ്കര എക്സൈറ്റഡ് ആയിരുന്നുവെന്നും മാസങ്ങളോളം ചിത്രത്തിനു വേണ്ടി ഹോം വര്ക്കുകള് ചെയ്തെന്നും അനു മേനോന് വെളിപ്പെടുത്തി. ഈ വര്ഷം അവസാനത്തോടെ ചിത്രീകരണം ആരംഭിച്ച് 2020 ല് തീയറ്ററുകളിലെത്തിക്കാനുമാണ് തീരുമാനിച്ചിരിക്കുന്നത്.