അളക ഖാനം-
ദുബായ്: യുഎഇയില് പൊതുമാപ്പ് കാലാവധി നീട്ടാന് സാധ്യതയെന്ന് റിപ്പോര്ട്ട്. ഇക്കാര്യമാവശ്യപ്പെട്ട് വിവിധ നയതന്ത്ര വിഭാഗങ്ങള് യുഎഇ ഭരണകൂടത്തെ സമീപിച്ചതായാണ് വിവരം. അതേസമയം, കാലാവധി നീട്ടുന്നത് സംബന്ധിച്ച് അന്തിമ പ്രഖ്യാപനം ചൊവ്വാഴ്ച ഉണ്ടായേക്കും. ഓഗസ്റ്റ് ഒന്നുമുതല് മൂന്നു മാസത്തേക്ക് പ്രഖ്യാപിച്ച പൊതുമാപ്പ് കാലാവധി ബുധനാഴ്ചയാണ് അവസാനിക്കുന്നത്.
അനധികൃതമായി രാജ്യത്തു തങ്ങുന്ന വിദേശികളായ തൊഴിലാളികള്ക്ക് നാമമാത്ര ഫീസു നല്കി രേഖകള് ശരിയാക്കി താമസം തുടരാന് പൊതുമാപ്പ് വഴി അവസരം ലഭിച്ചിരുന്നു. രാജ്യത്തു തുടരാന് ആഗ്രഹമില്ലാത്തവര്ക്ക് ശിക്ഷാനടപടി കൂടാതെ രാജ്യം വിടാനും ഇതിലൂടെ സാധിക്കും. ഇതിനുമുമ്പ് 2013ലാണ് യുഎഇ അവസാനമായി പൊതുമാപ്പ് പ്രഖ്യാപിച്ചത്.