ഫിദ-
കൊച്ചി: വെട്ടിക്കുറച്ച സബ്‌സിഡി പഞ്ചസാര വിഹിതം സപ്ലൈകോ പുനഃസ്ഥാപിച്ചു. ഇനി റേഷന്‍ കാര്‍ഡിന് ഒരു കിലോഗ്രാം സബ്‌സിഡി പഞ്ചസാര ലഭിക്കും. ഒക്ടോബര്‍ ഒന്നു മുതലാണ് പഞ്ചസാര അരക്കിലോ ഗ്രാമായി വെട്ടിക്കുറച്ചത് പ്രാബല്യത്തില്‍ വന്നത്. തുടര്‍ന്നാണ് തീരുമാനം പുനഃപരിശോധിച്ചത്. ഇന്നലെ ഒരു കിലോഗ്രാം തോതില്‍ വിതരണം ആരംഭിച്ചു.
സബ്‌സിഡി അരിയുടെ വിതരണത്തിലെ പഴയ ക്രമീകരണവും തിരികെ കൊണ്ടുവന്നു. സബ്‌സിഡി നിരക്കിലെ അരി വിതരണം രണ്ടാഴ്ചയിലൊരിക്കല്‍ അഞ്ച് കിലോയാക്കിയ തീരുമാനം മാറ്റി മാസത്തിലൊരിക്കല്‍ പത്തു കിലോയാക്കണമെന്നാണ് ഉത്തരവ് ഇറങ്ങിയത്. പൊതുവിപണിയില്‍ ഇടപെടുന്നതിനായി വി.എസ് സര്‍ക്കാരിന്റെ കാലത്താണ് സപ്ലൈകോ വഴി പഞ്ചസാരയുള്‍പ്പെടെ 13 അവശ്യസാധനങ്ങള്‍ സബ്‌സിഡി നിരക്കില്‍ ലഭ്യമാക്കിയത്.
എന്നാല്‍ സപ്ലൈകോയുടെ സാമ്പത്തികനില മോശമായതോടെ സബ്‌സിഡി ഇനങ്ങള്‍ വെട്ടിക്കുറച്ചു. കഴിഞ്ഞ മാസം കേന്ദ്ര, സംസ്ഥാന സര്‍ക്കാരുകളില്‍ നിന്ന് സബ്‌സിഡി കുടിശിക ലഭിച്ചതോടെ വെട്ടിക്കുറച്ചവ പുനഃസ്ഥാപിക്കുകയായിരുന്നു. അതേസമയം സബ്‌സിഡി വെളിച്ചെണ്ണ അളവ് ഒന്നില്‍ നിന്ന് അര ലിറ്ററാക്കിയത് പുനഃസ്ഥാപിച്ചിട്ടില്ല.
