ഫിദ-
ദുല്‍ഖര്‍ സല്‍മാന്‍ സുകുമാര കുറുപ്പാകുന്ന ചിത്രം ‘കുറുപ്പി’ന്റെ ഷൂട്ടിംഗ് വിവിധ ലൊക്കേഷനുകളിലായി പുരോഗമിക്കുകയാണ്. ഇപ്പോള്‍ ചിത്രത്തിന്റെ ഷൂട്ടിംഗ് ദുബായിയിലാണ്. എണ്‍പതുകളുടെ ബുള്‍ഗാന്‍ താടിയും മുടി നീട്ടി വളര്‍ത്തിയുമുള്ള ദുല്‍ഖറിന്റെ പുതിയ ലുക്ക് സുകുമാര കുറുപ്പിന്റെ ഛായ തോന്നുന്നു എന്നാണ് ആരാധകരുടെ കമന്റ്.
ചിത്രത്തില്‍ ദുല്‍ഖര്‍ സല്‍മാനാണ് എക്കാലത്തേയും പിടികിട്ടാ പുള്ളിയായ കുറുപ്പിന്റെ കഥാപാത്രത്തെ അവതരിപ്പിക്കുന്നത്. രണ്ട് മാസങ്ങള്‍ക്ക് മുമ്പാണ് ചിത്രത്തിന്റെ ഷൂട്ടിങ് ആരംഭിച്ചത്. ഇന്ദ്രജിത്തും ഷെയ്ന്‍ ടോം ചാക്കോയും ടൊവിനോയുമാണ് ചിത്രത്തിന്റെ മറ്റ് പ്രധാന കഥാപാത്രങ്ങള്‍. ചിത്രത്തിന്റെ ആദ്യ ഷെഡ്യൂള്‍ ഗുജറാത്തിലും ഹൈദരാബാദിലും അഹമ്മഹാബാദിലുമായി പൂര്‍ത്തിയാക്കി. തുടര്‍ന്നാണ് ചിത്രത്തിന്റെ അടുത്ത ഷെഡ്യൂള്‍ ദുബായിയില്‍ പുരോഗമിക്കുന്നത്.
ശ്രീനാഥ് രാജേന്ദ്രന്‍ സംവിധാനം ചെയ്യുന്ന ചിത്രത്തില്‍ ശോഭിതാ ധൂലിപാല, സണ്ണി വെയ്ന്‍ എന്നിവരും ഉണ്ടാകുമെന്നാണ് ലഭിക്കുന്ന റിപ്പോര്‍ട്ട്. അരവിന്ദ് കെ എസ്സും ഡാനിയല്‍ സായൂജ് നായരും ചേര്‍ന്നാണ് ചിത്രത്തിന്റെ തിരക്കഥ ഒരുക്കിയിരിക്കുന്നത്. ദുല്‍ഖറിന്റെ നിര്‍മ്മാണ കമ്പനിയായ വെയ്‌ഫെറര്‍ ഫിലിംസ് ആണ് ചിത്രം നിര്‍മ്മിക്കുന്നത്.
