സിപിഎഫ് വേങ്ങാട്-
മലബാറിലെ മുസ്ലിം കവയിത്രികളില്‍ ശ്രദ്ധ പിടിച്ചു പറ്റിയ എഴുത്തുകാരിയാണ് അനീസ സുബൈദ. സൂര്യ ശില എന്ന അവരുടെ ആദ്യ കവിതാ സമാഹാരം ഇതിനകം തന്നെ ഒരുപാട് ചര്‍ച്ചകള്‍ക്ക് വഴിവെച്ചിട്ടുണ്ട്. 42, കവിതകളുടെ സമാഹാരമാണ് സൂര്യശില. സ്‌നേഹവും ജീവിതവും നിറഞ്ഞൊഴുകുന്ന കവിതകളാല്‍ സമ്പന്നമാണ് ഈ കൃതി, പൊറുതി കേടില്‍ നിന്നും വിരിഞ്ഞിറങ്ങിയ ഈ കവിതാ സമാരത്തിലെ മിക്ക കവിതകളും സാഹിത്യത്തില്‍ ഒറ്റപ്പെട്ട ശബദ്മായി മാറുന്നു.
ഊഷര ഭൂമിയില്‍, ആവണിയുടെ തേങ്ങല്‍, വിഷുപ്പക്ഷിയുടെ വിലാപം എന്നിവ ഇതില്‍ ശ്രദ്ധേയമായ കവിതകളാണ്. സമൂഹ്യമായ തിന്മകള്‍ക്കെതിരെ ഒരു കുടുംബിനിയുടെ ചേതോവികാരമാണ് ഈ കവിതകളുടെ സ്പന്ദനം.
”മേടപ്പുലരി പിന്നെയും വന്നു
എന്നിട്ടും വന്നില്ല എന്റെ ഊഴം ” എന്ന് വിഷുപ്പക്ഷിയുടെ വിലാപം കേള്‍ക്കുമ്പോള്‍ പ്രകൃതിയെ നശിപ്പിക്കുന്നതോര്‍ത്ത് വിങ്ങിപ്പൊട്ടുന്ന ഒരു കവി ഹൃദയത്തെ നമുക്ക് വായിച്ചെടുക്കാനാവും.
പ്രശസ്ത കവി പി പി ശ്രീധരനുണ്ണിയാണ് ഇതിന് അവതാരിക എഴുതിയിരിക്കുന്നത്. ആത്മനിഷ്ഠമാണ് ഇതിലെ ഓരോ വരികളും. സ്ത്രീ സമൂഹത്തിന്റെയും മാതൃ സമൂഹത്തിന്റെയും പ്രതിനിധിയായി നിലകൊള്ളുന്ന അനീസ ശാന്തമായി പ്രതികരിക്കുകയാണെന്ന് അവതാരികയില്‍ ്അദ്ദേഹം വ്യക്തമാക്കുന്നു.
കേരള ബുക്ക് ട്രസ്റ്റാണ് ഇത് പ്രസിദ്ധീകരിച്ചത്. 70 രൂപയാണ് വില. വരും കാലങ്ങളില്‍ ഈ കൃതി ഏറെ ചര്‍ച്ച ചെയ്യപ്പെടുമെന്നാണ് സാഹിത്യ ലോകത്തിന്റെ പ്രതീക്ഷ.
