ഗായത്രി-
കൊച്ചി: ഇന്ത്യക്കാരിലെ ഏറ്റവും വലിയ കോടീശ്വരി എന്ന സ്ഥാനം ഗോദ്റെജ് കുടുംബത്തിലെ സ്മിത വി. കൃഷ്ണക്ക്. കൊട്ടക് വെല്ത്ത് മാനേജ്മെന്റിന്റെ പിന്തുണയോടെ ഹുറൂണ് റിപ്പോര്ട്ട് ഇന്ത്യ പ്രസിദ്ധീകരിച്ച സമ്പന്നരായ വനിതകളുടെ പട്ടികയിലാണ് 67കാരിയായ സ്മിത ഒന്നാം സ്ഥാനത്തെത്തിയത്. 37,570 കോടി രൂപയാണ് അവരുടെ ആസ്തി.
കൃഷ്ണയും സഹോദരങ്ങളും കൂടി ഗോദ്റെജ് ഗ്രൂപ്പിന്റെ അഞ്ചിലൊന്ന് ഓഹരികള് കൈയാളുന്നുണ്ട്. എച്ച്.സി.എല്. എന്റര്െ്രെപസ് എക്സിക്യൂട്ടീവ് ഡയറക്ടറും സി.ഇ.ഒ.യുമായ റോഷ്നി നാടാര് (36) ആണ് പട്ടികയില് രണ്ടാം സ്ഥാനത്ത്. എച്ച്.സി.എല്. സ്ഥാപകന് ശിവ് നാടാറിന്റെ മകളായ റോഷ്നിയുടെ ആസ്തി 30,200 കോടി രൂപയാണ്. റോഷ്നിയുടെ അമ്മയും ശിവ് നാടാറിന്റെ ഭാര്യയുമായ കിരണ് നാടാര് അഞ്ചാം സ്ഥാനത്തുണ്ട്. 20,120 കോടി രൂപയാണ് അവരുടെ ആസ്തി.
ബെന്നറ്റ് കോള്മാന് ആന്ഡ് കമ്പനിയുടെ ഇന്ദു ജെയിന് ആണ് മൂന്നാം സ്ഥാനത്ത്. 26,240 കോടി രൂപയാണ് ആസ്തി. 24,790 കോടി രൂപയുടെ ആസ്തിയുമായി ബയോകോണ് മേധാവി കിരണ് മജുംദാര് ഷാ ആണ് നാലാം സ്ഥാനത്ത്.