സലാല ടൂറിസം ഫെസ്റ്റിന് പത്തിന് കൊടി ഉയരും

സലാല ടൂറിസം ഫെസ്റ്റിന് പത്തിന് കൊടി ഉയരും

അളക ഖാനം
സലാല: ദോഫാറിന്റെ മഴക്കാല ഉത്സവമായ സലാല ടൂറിസം ഫെസ്റ്റിവലിന് ഈ മാസം പത്തിന് കൊടി ഉയരും. ആഗസ്റ്റ് മൂന്നാം വാരത്തില്‍ വലിയ പെരുന്നാള്‍ അവധി പൂര്‍ത്തിയാകുന്നതുവരെ ഫെസ്റ്റിവല്‍ തുടരും. ദോഫാര്‍ ഗവര്‍ണര്‍ സയ്യിദ് മുഹമ്മദ് ബിന്‍ സുല്‍ത്താന്‍ ബിന്‍ ഹമൂദ് അല്‍ ബുസൈദിയുടെ രക്ഷാകര്‍തൃത്വത്തില്‍ തിങ്കളാഴ്ച നടന്ന ടൂറിസം ഫെസ്റ്റിവല്‍ നടത്തിപ്പ് കമ്മിറ്റിയുടെ യോഗത്തിലാണ് ഇതുസംബന്ധിച്ച പ്രഖ്യാപനം ഉണ്ടായത്.
ഇത്തീനിലെ നഗരസഭ മൈതാനിയിലാണ് ഫെസ്റ്റിവല്‍ നടക്കുക. ഇവിടെ ഒരുക്കങ്ങള്‍ അവസാനഘട്ടത്തിലാണ്. ഒമാന്റെ പൈതൃകവും സംസ്‌കാരവും ഒപ്പം ദോഫാര്‍ ഗവര്‍ണറേറ്റിലെ ജീവിതത്തെ കുറിച്ചും പ്രതിപാദിക്കുന്ന പ്രത്യേക പ്രദര്‍ശനങ്ങളും ഇക്കുറി സലാല ടൂറിസം ഫെസ്റ്റിവലില്‍ ഉണ്ടാകും. അന്താരാഷ്ട്ര കലാകാരന്മാരുടെ പ്രദര്‍ശനങ്ങളും ഉണ്ടാകും. എല്ലാ പ്രായത്തിലുള്ളവര്‍ക്കും വിനോദവും വിജ്ഞാനവും പ്രധാനം ചെയ്യുന്ന പരിപാടികളായിരിക്കും ടൂറിസം ഫെസ്റ്റിവലില്‍ ഒരുക്കുക. കമ്പനികളുടെയും സര്‍ക്കാര്‍ ഏജന്‍സികളുടെയും സ്റ്റാളുകളും ഇവിടെയുണ്ടാകും. കുട്ടികള്‍ക്കുള്ള വിനോദോപാധികളും ഫെസ്റ്റിവല്‍ നഗരിയില്‍ ഒരുക്കും.

Post Your Comments Here ( Click here for malayalam )
Press Esc to close