ഫിദ
കൊച്ചി: നേരിയ കയറ്റത്തിന് ശേഷം റബര്‍വില വീണ്ടും നഷ്ടത്തിലേക്ക് വീണു. 125.50 രൂപവരെ ഉയര്‍ന്ന ആര്‍.എസ്.എസ് നാലാം ഗ്രേഡ് റബര്‍വില 122.50 രൂപയിലേക്ക് കൂപ്പുകുത്തി. അന്താരാഷ്ട്ര വിപണിയുടെ ചുവടുപിടിച്ച് ഒരു രൂപയോളം വില വര്‍ധന നേടിയശേഷമായിരുന്നു ഈ വീഴ്ച. ആര്‍.എസ്.എസ് അഞ്ചാംഗ്രേഡിന്റെ വില 123 രൂപയില്‍ നിന്ന് 120 രൂപയിലേക്കും ഇടിഞ്ഞു.
കനത്ത മഴമൂലം ഏറെക്കാലം മുമ്പ് നിറുത്തിവച്ച ടാപ്പിംഗ് ഇനിയും പുനരാരംഭിച്ചിട്ടില്ല. വിപണിയിലേക്ക് കാര്യമായി റബര്‍ എത്തുന്നുമില്ല. ഈ സാഹചര്യത്തില്‍ വില കൂടുകയാണ് വേണ്ടത്. എന്നാല്‍, പ്രതീക്ഷിച്ചത്ര ഡിമാന്‍ഡും ഇല്ലാത്തതിനാല്‍ വില നിര്‍ജീവമായി തുടരുന്നു. വ്യാപാരികളുടെ കൈവശം റബര്‍ സ്‌റ്റോക്കുണ്ട്. വില ഉയരുമെന്ന പ്രതീക്ഷയോടെ കരുതിവച്ച സ്‌റ്റോക്കാണിത്. ഡിമാന്‍ഡുണ്ടായാല്‍ ഈ സ്‌റ്റോക്കും വിപണിയിലെത്തും. ഇതു വില കൂടുതല്‍ താഴാനേ വഴിയൊരുക്കൂ.
ഇപ്പോഴും മറ്റു പ്രമുഖ ഉത്പാദക രാജ്യങ്ങളെ അപേക്ഷിച്ച് ഇന്ത്യയിലാണ് റബര്‍വില കൂടുതല്‍. ഇത് ഇറക്കുമതിയെ പ്രോത്‌സാഹിപ്പിക്കുന്നുണ്ട്. ചൈനയില്‍ ആര്‍.എസ്.എസ് 4ന് കിലോയ്ക്ക് 112 രൂപ മാത്രമാണ് വില.
