വിഷ്ണു പ്രതാപ്
ന്യൂഡല്ഹി: അന്താരാഷ്ട്ര വിപണിയില് ക്രൂഡ് വില ഉയരുകയാണെങ്കിലും തല്ക്കാലം രാജ്യത്തെ പെട്രോള്, ഡീസല് വില വര്ധിപ്പിച്ചേക്കില്ല. രാജ്യത്തെ പൊതുമേഖല എണ്ണക്കമ്പനികള്ക്ക് ഇതുസംബന്ധിച്ച നിര്ദേശം സര്ക്കാര് നല്കിയതായാണ് സൂചന. ലിറ്ററിന് ഒരു രൂപ നഷ്ടം സഹിക്കണമെന്നാണ് എണ്ണക്കമ്പനികളോട് ആവശ്യപ്പെട്ടിരിക്കുന്നതെന്നാണ് അറിയുന്നത്. ഇതുസംബന്ധിച്ച് ഔദ്യോഗിക വിവരങ്ങളൊന്നും പുറത്തുവന്നിട്ടില്ലെങ്കിലും തെരഞ്ഞെടുപ്പ് മുന്നില് കണ്ടാണ് സര്ക്കാര് നിര്ദേശമെന്നാണ് വിലയിരുത്തല്.
റിപ്പോര്ട്ട് പുറത്തുവന്നതിനെതുടര്ന്ന് ഓയില് മാര്ക്കറ്റിങ് കമ്പനികളുടെ ഓഹരി വില കൂപ്പുകുത്തി.
ഭാരത് പെട്രോളിയം കോര്പ്പറേഷന്, ഹിന്ദുസ്ഥാന് പെട്രോളിയം കോര്പ്പറേഷന്, ഇന്ത്യന് ഓയില് കോര്പ്പറേഷന്(ഐഒസി) തുടങ്ങിയ കമ്പനികളുടെ ഓഹരികളാണ് നഷ്ടത്തിലായത്. ജിഎസ്ടിയില്നിന്നുള്ള വരുമാനത്തില് കാര്യമായ വര്ധനവില്ലാത്തതിനാല് എക്സൈസ് ഡ്യൂട്ടി കുറയ്ക്കാന് കഴിയില്ലെന്ന നിലപാടിലാണ് സര്ക്കാര്.ആവശ്യമുള്ളതില് 80 ശതമാനത്തിലേറെ എണ്ണ ഇറക്കുമതിയെ ആശ്രയിച്ചാണ് രാജ്യം മുന്നോട്ടുപോകുന്നത്.