വിഷ്ണു പ്രതാപ്
ന്യൂഡല്‍ഹി: ബാങ്കുകളില്‍ മൂലധനസമാഹരണത്തിനായി പ്രഖ്യാപിച്ച ഭാരത്മാല പദ്ധതിക്കെതിരെയാണ് മുന്‍ ധനമന്ത്രി പി ചിദംബരം രംഗത്ത്. സമ്പദ്‌വ്യവസ്ഥ ശക്തമെങ്കില്‍ ബാങ്കുകളില്‍ മൂലധനസമാഹരണം നടത്തുന്നതെന്തിനെന്ന് അദ്ദേഹം ചോദിച്ചു. നോട്ട് പിന്‍വലിക്കലും ജി.എസ്.ടിയും ഇന്ത്യന്‍ സമ്പദ്‌വ്യവസ്ഥയെ പ്രതികൂലമായി ബാധിച്ചുവെന്നും ചിദംബരം പറഞ്ഞു.
20042009 കാലയളവില്‍ 8.5 ശതമാനം വളര്‍ച്ച ഇന്ത്യന്‍ സമ്പദ്‌വ്യവസ്ഥയിലുണ്ടായിരുന്നു. എന്നാല്‍ 2014ന് ശേഷം അത് വന്‍തോതില്‍ കുറയുകയായിരുന്നു. നോട്ട് പിന്‍വലിക്കലാണ് സമ്പദ്‌വ്യവസ്ഥയുടെ തകര്‍ച്ചക്ക് കാരണം. നോട്ട് പിന്‍വലിക്കലിന്റെ ഒരു ലക്ഷ്യവും സര്‍ക്കാറിന് നേടാന്‍ സാധിച്ചിട്ടില്ല. തീരുമാനത്തിന് ശേഷം കള്ളപ്പണമൊന്നും കണ്ടെത്താന്‍ കഴിഞ്ഞില്ല. കൊതുകുണ്ടെന്ന് കരുതി വീട് തന്നെ കത്തിക്കുന്നതിന് തുല്യമാണ് സര്‍ക്കാറിന്റെ ഇപ്പോഴത്തെ നടപടികളെന്ന് ചിദംബരം പരിഹസിച്ചു.
നോട്ട് നിരോധനത്തിന്റെ തകര്‍ച്ചയില്‍ നിന്ന് സമ്പദ്‌വ്യവസ്ഥ കരകയറുന്നതിന് മുമ്പ് രാജ്യത്ത് ജി.എസ്.ടി നടപ്പിലാക്കി. വിവിധ സ്ലാബുകളുള്ള ഈ നികുതിയെ ജി.എസ്.ടിയെന്ന് വിളിക്കാന്‍ സാധിക്കില്ലെന്നും ചിദംബരം പറഞ്ഞു.
