ചൈനീസ് സ്മാര്‍ട്‌ഫോണ്‍ നിര്‍മ്മാതാക്കളായ വണ്‍പ്ലസിന്റെ സ്മാര്‍ട്ട്‌ഫോണ്‍ ശ്രേണിയിലെ ഏറ്റവും പുതിയ മോഡല്‍ വണ്‍പ്ലസ് 10 പ്രോ ജനുവരിയില്‍ വിപണിയിലെത്തും.
ചൈനീസ് മൈക്രോ ബ്ലോഗിങ് വെബ്‌സൈറ്റായ വെയ്‌ബോയില്‍ പ്രസിദ്ധീകരിച്ച ഒരു പോസ്റ്റിലൂടെയാണ് വണ്‍പ്ലസിന്റെ സഹസ്ഥാപകനായ പീറ്റ് ലോ ഈ വാര്‍ത്ത പുറത്തുവിട്ടത്.
വണ്‍പ്ലസ് 9 പ്രോയുടെ പിന്‍ഗാമിയായിട്ടാവും 10 പ്രോ വിപണിയിലെത്തുക. ക്വാല്‍ കോമിന്റെ ഏറ്റവും പുതിയ പ്രോസസറായ സ്‌നാപ് ഡ്രാഗണ്‍ 8 ജെന്‍ 1 പ്രോസസ്സറിന്റെ കരുത്തോടെയാകും വണ്‍പ്ലസ് 10 പ്രോ പുറത്തിറക്കുക, എന്നാണ് വാര്‍ത്തകള്‍.
വണ്‍പ്ലസ് 10 പ്രോ കൂടാതെ വണ്‍പ്ലസ് 10 മോഡലും വിപണിയില്‍ എത്തുമെന്നാണ് അറിയുന്നത്.
വണ്‍പ്ലസ് 10 പ്രോ പ്രതീക്ഷിക്കുന്ന സവിശേഷതകള്‍:
ചതുരാകൃതിയിലുള്ള പിന്‍ ക്യാമറകളാകും ഫോണിലുണ്ടാവുക. സൂം സംവിധാനത്തോട് കൂടിയ 48 മെഗാപിക്‌സലിന്റെ പ്രൈമറി ലെന്‍സ് ക്യാമറയാകും ഉണ്ടാകുക. 120 ഹെര്‍ട്‌സ് റിഫ്രഷ് റേറ്റോഡ് കൂടിയ 6.7 ഇഞ്ച് ക്യുഎച്ഡി+ ഡിസ്‌പ്ലേയും, 12 ജിബി വരെ സപ്പോര്‍ട്ട് ചെയ്യുന്ന എല്‍പിഡിഡിആര്‍ 5 റാം, 256 ജിബി സ്‌റ്റോറേജ് വരെ സപ്പോര്‍ട്ട് ചെയുന്ന യുഎഫ്എസ് 3.1, ഫാസ്റ്റ് ചാര്‍ജിങ് ഉള്ള 5000 mAh ബാറ്ററി എന്നിവയാണ് പ്രതീക്ഷിക്കുന്ന പ്രധാന സവിശേഷതകള്‍.
ഈ ഫോണില്‍ ആന്‍ഡ്രോയിഡിന്റെ ഏറ്റവും പുതിയ പതിപ്പായ ആന്‍ഡ്രോയിഡ് 12 ഉം വണ്‍പ്ലസിന്റെ തനത് ഓപ്പറേറ്റിംഗ് സിസ്റ്റമായ ഓക്‌സിജന്‍ ഓഎസ് 12 ഉം ഉള്‍പ്പെടുമെന്നാണ് റിപ്പോര്‍ട്ടുകള്‍.
2022 ജനുവരി 5 ന് ലാസ് വെഗാസില്‍ നടക്കുന്ന CES 2022ല്‍ വണ്‍പ്ലസ് 10 സീരീസ് ലോഞ്ച് ചെയ്യാന്‍ ആസൂത്രണം ചെയ്യുമെന്നാണ് വിവരം. എന്നാല്‍ ഔദ്യോഗികമായ ഒരു തീയതി കമ്പനി പുറത്തുവിട്ടിട്ടില്ല.
