അളക ഖാനം-
ജിദ്ദ: അരാംകോ ഭീകരാക്രമണത്തെ തുടര്ന്ന് ഭാഗികമായി തടസ്സപ്പെട്ട സൗദി അറേബ്യയുടെ എണ്ണ വിതരണം പൂര്വ സ്ഥിതിയിലായെന്ന് ഊര്ജമന്ത്രി അമീര് അബ്ദുല് അസീസ് ബിന് സല്മാന്. ശനിയാഴ്ചക്കു മുമ്പുള്ള അവസ്ഥയിലേക്ക് എണ്ണവിതരണം എത്തിയിട്ടുണ്ട്. ഇന്നലെ രാത്രി വൈകി ജിദ്ദയില് നടത്തിയ വാര്ത്താസമ്മേളനത്തിലാണ് പ്രതിസന്ധി തരണം ചെയ്ത നിര്ണായകവിവരം സൗദി ഊര്ജമന്ത്രി പ്രഖ്യാപിച്ചത്.
ഈ മാസം ഉപഭോക്തൃരാജ്യങ്ങള്ക്കുള്ള എണ്ണവിതരണം സാധാരണപോലെ തുടരും. സെപ്റ്റംബര് അവസാനത്തോടെ എണ്ണ ഉല്പാദന ശേഷി പ്രതിദിനം 11 ദശലക്ഷം ബാരലായി ഉയരുമെന്നും അമീര് അബ്ദുല് അസീസ് കൂട്ടിച്ചേര്ത്തു.
ആക്രമണത്തിന്റെ ഉറവിടത്തെ കുറിച്ച മാധ്യമപ്രവര്ത്തകരുടെ ചോദ്യത്തിന്, അത് ആഭ്യന്തര പ്രതിരോധ മന്ത്രാലയങ്ങള് പറയുമെന്ന് മന്ത്രി മറുപടി പറഞ്ഞു. സര്ക്കാര് ഗൗരവത്തില് തന്നെ ഇതിനെതിരെ നടപടി സ്വീകരിക്കും. അക്രമത്തിന് പിന്നില് ആരാണെന്ന് കണ്ടെത്താന് ഐക്യരാഷ്ട്ര സഭ അന്വേഷണസംഘത്തെ അയക്കുമെന്ന് മന്ത്രി പറഞ്ഞു. അന്താരാഷ്ട്ര സമൂഹം ആഗോള എണ്ണ വിപണിക്കും സാമ്പത്തിക വ്യവസ്ഥക്കും നേരെയുള്ള ആക്രമണത്തെ ശക്തമായി നേരിടണം. എണ്ണ ഉദ്പാദകരാഷ്ട്ര കൂട്ടായ്മ ഇതുമായി ബന്ധപ്പെട്ട രാഷ്ട്രീയവിവാദങ്ങളില് അഭിപ്രായം പറയാറില്ല.