ന്യൂഡല്ഹി: ഇന്ത്യയിലെ ഏറ്റവും വലിയ കാര് കമ്പനിയായ മാരുതി സുസുക്കി നടപ്പ് സാമ്പത്തിക വര്ഷത്തിന്റെ ആദ്യപാദത്തില് 1,556.4 കോടി രൂപ അറ്റാദായം നേടി.
അതേസമയം, വരുമാനം 14,654.5 കോടി രൂപയില് നിന്ന് 16.7 ശതമാനം ഉയര്ന്ന് 17,132.4 കോടി രൂപയിലെത്തി.
2017 ഏപ്രില്ജൂണ് പാദത്തില് കമ്പനി 3,94,571 കാറുകള് വിറ്റഴിച്ചു. മുന് വര്ഷം ആദ്യ പാദത്തിലേതിനെ അപേക്ഷിച്ച് 13.2 ശതമാനമാണ് വളര്ച്ച. മൊത്തം വില്പ്പനയില് 26,140 യൂണിറ്റുകള് വിദേശങ്ങളിലേക്കുള്ള കയറ്റുമതിയാണ്.
മുന് വര്ഷം ഇതേ കാലയളവിലേതുമായി താരതമ്യം ചെയ്താല് 4.4 ശതമാനം വളര്ച്ചയാണ്. അസംസ്കൃത വസ്തുക്കളുടെ വില ഉയര്ന്നതും ജി.എസ്.ടി.യിലേക്കുള്ള മാറ്റം മൂലമുള്ള ചെലവുകളുമാണ് ലാഭ വളര്ച്ച 4.4 ശതമാനത്തില് ഒതുങ്ങാന് കാരണം