ഗായത്രി-
കൊച്ചി: അപ്രതീക്ഷിതമായി ചെറുനാരങ്ങയുടെ വിലയിലുണ്ടായ വര്‍ധന വ്യാപാരികളെ സാരമായി ബാധിച്ചു. രണ്ടാഴ്ച മുമ്പ് 60 രൂപമുതല്‍ 80 രൂപവരെ മാത്രം വിലയുണ്ടായിരുന്ന ചെറുനാരങ്ങയ്ക്ക് ഏതാനും നാളായി 160 മുതല്‍ 170 രൂപവരെയാണ് വില. ഒരു നാരങ്ങയ്ക്ക് 15 മുതല്‍ 18 രൂപവരെ വിലവരും. കാലാവസ്ഥാ വ്യതിയാനം കാരണം തെങ്കാശി ഉള്‍പ്പെടെ ചെറുനാരങ്ങ വ്യാപകമായി കൃഷിചെയ്യുന്ന സ്ഥലങ്ങളില്‍ വിളവ് കുറഞ്ഞതാണ് വിലവര്‍ധനവിന് കാരണമെന്നാണ് വ്യാപാരികള്‍ പറയുന്നത്. ഇന്ന് കാലത്ത് നാരങ്ങവില 140 രൂപയായിട്ടുണ്ട്്. കന്നിമാസത്തില്‍ വിവാഹങ്ങള്‍ കുറവായതിനാല്‍ വരും നാളുകളില്‍ വില താഴുമെന്ന പ്രതീക്ഷയിലാണ് കച്ചവടക്കാര്‍.
സോഡ സര്‍ബത്ത് നാരങ്ങവെള്ളം കച്ചവടം നടത്തിവന്നവരെയാണ് വിലവര്‍ധന സാരമായി ബാധിച്ചത്. ദാഹമകറ്റാന്‍ മലയാളികള്‍ ഏറ്റവുമധികം ആശ്രയിച്ചുവരുന്ന ഇഷ്ടപാനീയമാണ് സോഡസര്‍ബത്ത്. സര്‍ബത്ത് വില്‍പനയിലൂടെ മാത്രം ഉപജീവനമാര്‍ഗം കണ്ടെത്തുന്ന നിരവധി ചെറുകിട കച്ചവടക്കാരും നാട്ടില്‍ നിരവധിയാണ്. എന്നാല്‍ കഴിഞ്ഞ ഏതാനും ദിവസങ്ങളായി പല കച്ചവടക്കാരും സര്‍ബത്ത് വ്യാപാരം നിര്‍ത്തിവെച്ച അവസ്ഥയിലാണ്. ചെറുനാരങ്ങ വില കുത്തനെ കൂടിയതാണ് ഇതിന് കാരണം. നാരങ്ങ അച്ചാറും ആഡംബര വിഭാഗത്തില്‍പ്പെട്ട അവസ്ഥയാണ്.
