എംഎം കമ്മത്ത്-
തിരു: വിനോദ സഞ്ചാരികള്ക്കായി കുറഞ്ഞ നിരക്കില് ബസിനുള്ളില് താമസ സൗകര്യം ഒരുക്കുന്ന പദ്ധതിയുമായി കെഎസ്ആര്ടിസി. മൂന്നാറിലെത്തുന്ന വിനോദ സഞ്ചാരികള്ക്ക് കെഎസ്ആര്ടിസിയുടെ പുതിയ എസി ബസില് താമസിക്കാം. ഈ പദ്ധതി പ്രകാരമുള്ള ആദ്യ ബസ് മൂന്നാറില് ആണ് സജ്ജമാക്കുക. ഒരേസമയം 16 പേര്ക്കു താമസ സൗകര്യമൊരുങ്ങുന്നത്. കിടക്കയും മൊബൈല് ചാര്ജിങ് പോര്ട്ടും ഉള്പ്പെടെ ട്രെയിനുകളിലെ സ്ലീപ്പര് കോച്ച് മാതൃകയില് ആണ് കംപാര്ട്മെന്റുകള് ബസില് സജ്ജമാക്കുക. മൂന്നാര് ഡിപ്പോയിലാണ് ആദ്യ ബസ് പാര്ക്ക് ചെയ്യുക. ബസില് താമസിക്കുന്നവര്ക്ക് ഡിപ്പോയിലെ ശുചിമുറികള് ഉപയോഗിക്കാം. നിരക്ക് തീരുമാനിച്ചിട്ടില്ല. കെഎസ്ആര്ടിസി എം.ഡി ബിജു പ്രഭാകരന്റേതാണ് ആശയം. മൂന്നാറിലെ വിനോദ സഞ്ചാര മേഖല തുറന്നാലുടന് ബസ് താമസത്തിനായി നല്കുമെന്ന് ഡിപ്പോ ഇന്സ്പെക്ടര് ഇന് ചാര്ജ് സേവി ജോര്ജ് അറിയിച്ചു.
