ഫിദ-
ചെന്നൈ: നയന്താര പ്രധാന വേഷത്തിലെത്തുന്ന തമിഴ് ചിത്രം ‘കൊലൈയുതിര്കാലം’ റിലീസ് ചെയ്യുന്നത് മദ്രാസ് ഹൈക്കോടതി താത്കാലികമായി തടഞ്ഞു. പേരിനെച്ചൊല്ലിയുള്ള പകര്പ്പവകാശ തര്ക്കത്തെ തുടര്ന്നാണിത്.
അന്തരിച്ച തമിഴ് എഴുത്തുകാരന് സുജാത രംഗരാജന്റെ നോവലിന്റെ പേരാണ് കൊലൈയുതിര്കാലം. ഈ നോവലിന്റെ പകര്പ്പവകാശം വാങ്ങിയ തന്റെ അനുമതി കൂടാതെ പേര് ഉപയോഗിക്കാന് പാടില്ലെന്ന് ചൂണ്ടിക്കാട്ടി സംവിധായകനായ ബാലാജി കുമാര് സമര്പ്പിച്ച ഹര്ജിയെത്തുടര്ന്നാണ് ജസ്റ്റിസ് കൃഷ്ണരാമസ്വാമി റിലീസ് തടഞ്ഞത്.
സുജാത രംഗരാജന്റെ ഭാര്യയില്നിന്ന് 10 ലക്ഷം രൂപക്കാണ് താന് പകര്പ്പവകാശം വാങ്ങിയതെന്ന് ബാലാജികുമാര് പറയുന്നു.
ചക്രി ടോലേട്ടി സംവിധാനം ചെയ്ത സിനിമ വെള്ളിയാഴ്ച റിലീസ് ചെയ്യാനിരിക്കെയാണ് കോടതി ഉത്തരവ്. 21ന് വീണ്ടും കേസ് പരിഗണിക്കുമ്പോള് എതിര്സത്യവാങ്മൂലം സമര്പ്പിക്കാന് നിര്മാതാക്കളോട് കോടതി നിര്ദേശിച്ചു.