എംഎം കമ്മത്ത്-
തിരു: ഗതാഗതനിയമങ്ങള്‍ ലംഘിച്ചാല്‍ ഇനി എപ്പൊള്‍ വേണമെങ്കിലും പിടിവീഴാം. പോലീസിന്റെയും മോട്ടോര്‍വാഹന വകുപ്പിന്റെയും വാഹനപരിശോധന സംവിധാനങ്ങള്‍ ഓണ്‍ലൈനായതോടെ ഗതാഗതനിയമങ്ങള്‍ ലംഘിച്ചാല്‍ എപ്പോള്‍ വേണമെങ്കിലും പിടിവീഴാം. പിഴയടക്കാനുള്ള സന്ദേശം മൊബൈല്‍ഫോണില്‍ വരുമ്പോള്‍ മാത്രമാകും പെട്ടുപോയ കാര്യം അറിയുക. ഗതാഗത നിയമലംഘനങ്ങള്‍ക്ക് പിഴ ഈടാക്കാനുള്ള ഇ-ചെലാന്‍ സംവിധാനം വ്യാപകമായതോടെയാണ് ഈ മാറ്റം വന്നത്. റോഡരികില്‍ പാത്ത്‌നിന്ന് ചാടിവീണ് പിടികൂടുന്ന പഴയ ശൈലി മാറിയിരിക്കുകയാണ്. സ്മാര്‍ട്ട് ഫോണില്‍ കുറ്റകൃത്യങ്ങള്‍ പകര്‍ത്തി ഓണ്‍ലൈന്‍ ചെക്ക് റിപ്പോര്‍ട്ട് നല്‍കുകയാണ് ഇന്നത്തെ പുതിയ സംവിധാനം. അസി. മോട്ടോര്‍ വെഹിക്കിള്‍ ഇന്‍സ്‌പെക്ടര്‍മാര്‍ മുതല്‍ മുകളിലോട്ടുള്ള 900 എന്‍ഫോഴ്‌സ്‌മെന്‍് ഓഫീസര്‍മാരുടെയും മൊബൈല്‍ ഫോണുകളില്‍ ഇ-ചെലാന്‍ സംവിധാനം ഉണ്ടാകും. യൂണിഫോമിട്ട് ഡ്യൂട്ടിയില്‍ നില്‍ക്കുമ്പോള്‍ മാത്രമല്ല, ഗതാഗത നിയമലംഘനങ്ങള്‍ എവിടെവെച്ച് കണ്ണില്‍പ്പെട്ടാലും പിഴചുമത്താം. മൊബൈല്‍ ഫോണില്‍ ചിത്രമെടുത്താല്‍ മാത്രം മതിയാകും. പരിവാഹന്‍ വെബ്‌സൈറ്റുമായി ചേര്‍ന്നാണ് ഇത് പ്രവര്‍ത്തിക്കുന്നത്. പിഴചുമത്തിയ കാര്യം അറിയിച്ചുകൊണ്ട് വാഹന ഉടമയുടെ മൊബൈല്‍ ഫോണിലേക്ക് ഉടന്‍ എസ്എംഎസ് എത്തും.
ഹെല്‍മെറ്റ്, സീറ്റ് ബെല്‍റ്റ് എന്നിവ ഉപയോഗിക്കാതിരിക്കുക, നോ പാര്‍ക്കിങ്, വാഹനങ്ങളുടെ രൂപമാറ്റം, നമ്പര്‍ പ്ലേറ്റിിലെ ക്രമക്കേടുകള്‍, വാഹനങ്ങളുടെ രൂപമാറ്റം, കൂടാതെ വീലുകള്‍, സൈലന്‍സര്‍ എന്നിവയില്‍ മാറ്റംവരുത്തിയ വാഹനങ്ങള്‍, അനുവദനീയമല്ലാത്ത ലൈറ്റുകള്‍, ഹോണുകള്‍, കൂളിങ് ഫിലിം എന്നിവ ഉപയോഗിച്ചവര്‍ക്കും പിഴ നോട്ടീസാവരും. 30 ദിവസമാണ് പിഴയടക്കാന്‍ ലഭിക്കുക. പിഴ ഓണ്‍ലൈനായും അടക്കാം. സമയത്ത് പിഴ അടക്കാത്ത പക്ഷം ഓണ്‍ലൈനായി കോടതിയില്‍ കേസെത്തും. ‘സേഫ് കേരള’യുടെ 24 മണിക്കൂര്‍ സ്‌ക്വാഡുകള്‍കൂടി നിരത്തിലിറങ്ങിയാല്‍ പരിശോധന കൂടുതല്‍ കര്‍ശനമാകും.
