ഫിദ
ചെന്നൈ: ഉലകനായകന് കമലഹാസനും തന്റെ രാഷ്ട്രീയ പാര്ട്ടി പ്രഖ്യാപിക്കാന് ഒരുങ്ങുന്നു. ഫെബ്രുവരി 21ന് ചെന്നൈയില് പാര്ട്ടിയുടെ പേര് കമലഹാസന് പ്രഖ്യാപിക്കും. തമിഴ്നാട്ടിലെ രാമനാഥപുരത്ത് നിന്ന് സംസ്ഥാന വ്യാപകമായ ജാഥയും അന്ന് തന്നെ ആരംഭിക്കുമെന്നും കമല് പത്രക്കുറിപ്പില് പറഞ്ഞു.
കമലിന്റെ ജന്മനാടായ രാമനാഥപുരത്ത് നിന്ന് ആരംഭിക്കുന്ന പര്യടനം മധുര, ഡിണ്ടിഗല്, ശിവഗംഗ എന്നീ ജില്ലകളിലാവും ആദ്യഘട്ട പര്യടനം നടത്തുക. മറ്റു ജില്ലകളില് പിന്നീടായിരിക്കും ജാഥ എത്തുക. ജനങ്ങളുടെ ആവശ്യങ്ങള് എന്താണെന്ന് അറിയുക എന്നതാണ് ജാഥ കൊണ്ട് ഉദ്ദേശിക്കുന്നതെന്ന് കമലഹാസന് പ്രസ്താവനയില്പറഞ്ഞു. തമിഴ്നാട് രാഷ്ട്രീയത്തില് കാലങ്ങളായി നിലനില്ക്കുന്ന മാറാത്ത സാഹചര്യങ്ങളോട് പടപൊരുതാനാണ് താന് ഇറങ്ങുന്നത്. ഈ പോരാട്ടം വിജയിക്കണമെങ്കില് ജനങ്ങളുടെ ആവശ്യങ്ങളും ആഗ്രഹങ്ങളും എന്താണെന്ന് അറിയണം. അവരുടെ പ്രശ്നങ്ങളെ കുറിച്ച് അറിയണം, അതിനൊക്കെ പരിഹാരം കണ്ടെത്തണം കമല് പറഞ്ഞു.
രാഷ്ട്രീയ പാര്ട്ടി പ്രഖ്യാപനത്തിനൊപ്പം പാര്ട്ടിയുടെ നയങ്ങളും തത്വങ്ങളും പ്രഖ്യാപിക്കും. ഇതിന്റെയൊക്കെ അടിസ്ഥാനത്തില് ആയിരിക്കും തന്റെ മുന്നോട്ടുള്ള പോക്ക്. രാഷ്ട്രീയ പാര്ട്ടിയുടെ പേരില് ഗ്ലാമര് പരിവേഷമുണ്ടാക്കാനോ വിമത പ്രവര്ത്തനം നടത്താനോ അല്ല താന് ഉദ്ദേശിക്കുന്നത്. ജനങ്ങളെ നേരില്കണ്ട് അവരുടെ പ്രശ്നങ്ങള് അനുഭവിച്ച് അറിയുന്നതിന് വേണ്ടിയാണ് ഈ പര്യടനം. സംസ്ഥാനത്തെ തെറ്റായ പല കാര്യങ്ങളെയും ചോദ്യം ചെയ്യാന് തമിഴ്നാട്ടിലെ ജനങ്ങള് മുന്നോട്ട വരണമെന്നും കമല് കൂട്ടിച്ചേര്ത്തു.