വിഷ്ണു പ്രതാപ്
ന്യൂഡല്‍ഹി: രാജ്യത്ത് 200 രൂപാ നോട്ടുകള്‍ ഇന്ന് മുതല്‍് പ്രചാരത്തിലാകും. തിളങ്ങുന്ന മഞ്ഞ നിറത്തിലുള്ള നോട്ടില്‍ രാഷ്ട്രപിതാവ് മഹാത്മാ ഗാന്ധിയുടെ ചിത്രം മുന്‍വശത്ത് കാണാം. പുറക് വശത്ത് സാഞ്ചി സ്തൂപമാണുള്ളത്. റിസര്‍വ് ബാങ്ക് ഗവര്‍ണര്‍ ഉര്‍ജിത് പട്ടേലാണ് നോട്ടില്‍ ഒപ്പിട്ടിരിക്കുന്നത്.
200 രൂപാ നോട്ടിന് സാധുത നല്‍കി കേന്ദ്ര ധനമന്ത്രാലയം ഇന്നലെ ഗസറ്റ് വിജ്ഞാപനം പുറപ്പെടുവിച്ചിരുന്നു. 100,500 രൂപയുടെ കറന്‍സി നോട്ടുകള്‍ക്കിടയില്‍ ചില്ലറ ക്ഷാമം പരിഹരിക്കാന്‍ ലക്ഷ്യമിട്ട് ഇറക്കുന്ന 200 രൂപാ നോട്ട് ജനപ്രിയമാകുമെന്നാണ് റിസര്‍വ് ബാങ്കിന്റെ കണക്കുകൂട്ടല്‍. കള്ളനോട്ടിന്റെ വ്യാപനം തടയാനും ഇതുപകരിക്കുമെന്ന് പ്രതീക്ഷിക്കപ്പെടുന്നു. തുടക്കത്തില്‍ 50 കോടി നോട്ടുകളാണ് രാജ്യത്ത് പ്രചാരത്തിലുണ്ടാകുക.
