മുംബൈ: വാന്‍ ശ്രേണിയിലെ ആഡംബര വാഹന മോഡലായ മെഴ്‌സിഡസിന്റെ വി ക്ലാസ് ബെന്‍സ് വീണ്ടും സ്വന്തമാക്കിയിരിക്കുകയാണ് ബോളിവുഡ് സൂപ്പര്‍ സ്റ്റാര്‍ ഹൃത്വിക് റോഷന്‍.
അദ്ദേഹത്തിന്റെ ഗ്യാരേജിലെ രണ്ടാമത്തെ വി ക്ലാസാണ് ഇത്. ബെന്‍സിന്റെ ആഡംബര വാന്‍ വി ക്ലാസ് ഇന്ത്യയില്‍ പുറത്തിറങ്ങിയത് കുറച്ചു നാളുകള്‍ക്ക് മുമ്പാണ്.
മൂന്ന് വേരിയന്റുകളില്‍ ബെന്‍സ് വി ക്ലാസ് ഇന്ത്യയില്‍ എത്തുന്നുണ്ട്. 71.10 ലക്ഷം രൂപ മുതല്‍ 1.10 കോടി രൂപ വരെയാണ് ഈ ആഡംബര വാനിന് ഇന്ത്യയിലെ എക്‌സ്‌ഷോറും വില. മുംബൈയിലെ മെഴ്‌സിഡസിന്റെ ഡീലര്‍ഷിപ്പായ ഓട്ടോ ഹംഗറില്‍ നിന്നാണ് ഹൃതിക് തന്റെ പുതിയ വാഹനം സ്വന്തമാക്കിയത്.
റോള്‍സ് റോയ്‌സ് ഗോസ്റ്റ്, പോര്‍ഷെ കെയിന്‍, മിനി കൂപ്പര്‍, മെബാക്ക് എസ് 650, ബെന്‍സ് എസ് ക്ലാസ്, റേഞ്ച് റോവര്‍ തുടങ്ങി ലക്ഷ്വറി വാഹനങ്ങളുടെ നീണ്ട നിരയുള്ള ബൊളിവുഡ് സൂപ്പര്‍താരമാണ് ഹൃതിക്. ആദ്യ വി ക്ലാസിന് ഏഴു സ്റ്റാര്‍ സൗകര്യങ്ങളടങ്ങുന്ന മോഡിഫിക്കേഷന്‍ നടത്തിയിരുന്നു.
ഇലക്ട്രിക് സ്ലൈഡിങ് ഡോര്‍, പനോരമിക് സണ്‍റൂഫ്, തെര്‍മോട്രോണിക് ക്ലൈമറ്റ് കണ്‍ട്രോള്‍ സിസ്റ്റം, കമാന്റ് ഇന്‍ഫോടെയ്ന്‍മെന്റ് സിസ്റ്റം തുടങ്ങിയ നിരവധി സംവിധാനങ്ങളാണ് ഈ പുതിയ വാഹനത്തിന് ആഡംബര ഫീച്ചറുകള്‍. ഇങ്ങനെയുള്ള ആഡംബര ഫീച്ചറുകളും സൗകര്യങ്ങളുമാണ് സിനിമാതാരങ്ങളുടെ ഇഷ്ടവാഹനമായി ഇതിനെ മാറ്റുന്നത്.
ഏഴ്, എട്ട് സീറ്റര്‍ ഓപ്ഷനില്‍ വാഹനം ലഭ്യമാകും. പിന്നിലുള്ള സീറ്റ് മടക്കി ബെഡ്ഡാക്കിയും മാറ്റാവുന്ന ലക്ഷ്വറി സ്ലീപ്പര്‍ ഓപ്ഷനും വാഹനത്തിലുണ്ട്. ബിഎസ്6 നിലവാരത്തിലുള്ള 2.0 ലിറ്റര്‍ ഡീസല്‍ എന്‍ജിനാണ് ഈ വാഹനത്തിന് കരുത്തേകുന്നത്. ഇത് 161 ബിഎച്ച്പി പവറും 380 എന്‍എം ടോര്‍ക്കുമേകും. 2 ലീറ്റര്‍ എന്‍ജിന്‍ ഉപയോഗിക്കുന്ന കാറിന് 162 ബിഎച്ച്പി കരുത്തും 380 എന്‍എം ടോര്‍ക്കുമുണ്ട്. 10.9 സെക്കന്റില്‍ പൂജ്യത്തില്‍ നിന്ന് 100 കിലോമീറ്റര്‍ വേഗം കൈവരിക്കാനും ഈ വാഹനത്തിന് കഴിയും.
