ഫിദ-
കൊച്ചി: ഫ്‌ളിപ്കാര്‍ട്ട്, ആമസോണ്‍, സ്‌നാപ്ഡീല്‍ തുടങ്ങിയ ഓണ്‍ലൈന്‍ വ്യാപാരസ്ഥാപനങ്ങള്‍ ചരക്കു സേവന നികുതിയിനത്തില്‍ കൂടുതല്‍ ഈടാക്കിയ തുക ഉപഭോക്താക്കള്‍ക്ക് തിരിച്ചുനല്‍കിയോ എന്ന കാര്യം അന്വേഷിക്കണമെന്ന് ‘ദേശീയ കൊള്ളലാഭവിരുദ്ധ അതോറിറ്റി’ ബന്ധപ്പെട്ടവര്‍ക്ക് നിര്‍ദേശം നല്‍കി. സെന്‍ട്രല്‍ ബോര്‍ഡ് ഓഫ് ഇന്‍ഡയറക്ട് ടാക്‌സസ് ആന്‍ഡ് കസ്റ്റംസിലെ ഓഡിറ്റ് വിഭാഗത്തിനാണ് അതോറിറ്റി നിര്‍ദേശം നല്‍കിയത്. ഫഌപ്കാര്‍ട്ടുമായി ബന്ധപ്പെട്ട പരാതിയിലാണ് നടപടി.
ഓണ്‍ലൈന്‍ കമ്പനികളില്‍നിന്ന് സാധനങ്ങള്‍ വാങ്ങാനായി ഓര്‍ഡര്‍ നല്‍കുന്ന സമയത്ത് ഈടാക്കിയ ചരക്കു സേവന നികുതി ഉപഭോക്താവിന് ലഭ്യമാകുന്ന കാലയളവില്‍ കുറഞ്ഞതുമായി ബന്ധപ്പെട്ടാണ് പരാതി ഉയര്‍ന്നത്. ഓര്‍ഡര്‍ നല്‍കുന്ന സമയത്ത് അധിക നികുതിയടക്കമാണ് ഉപഭോക്താവ് സാധനങ്ങള്‍ക്ക് വിലയായി നല്‍കുന്നത്.
ഇത്തരത്തില്‍ അധികമായി നികുതിയിനത്തില്‍ ഈടാക്കിയ പണം ഉപഭോക്താക്കള്‍ തിരികെ നല്‍കണമെന്നാണ് ചട്ടം.
