ഗായത്രി
കൊച്ചി: ആഘോഷ ദിനങ്ങളില് മാര്കറ്റുകളില് ആളുകള് നിറയുന്നത് പണ്ടുമുതലേ കാണുന്ന പ്രതിഭാസമാണ്. എന്നാലിപ്പോള് ഓണ്ലൈന് മാര്കറ്റുകളാണ് ആഘോഷ ദിനങ്ങള് മുതലെടുക്കുന്നത്. പതിവ് പോലെ അടുത്ത ഫെസ്റ്റിവല് സെയിലുമായി എത്തിയിരിക്കുന്നു. റിപബ്ലിക് ദിനത്തെയാണ് വമ്പന് ഓഫറുകളുമായി വരാന് ഇന്ത്യന് ഓണ്ലൈന് മാര്കറ്റ് ഭീമന്മാര് പുതുതായി തിരഞ്ഞെടുത്തിരിക്കുന്നത്.
ആമസോണ് അവരുടെ ഗ്രേറ്റ് ഇന്ത്യന് സെയിലിന്റെ അടുത്ത എഡിഷന് പ്രഖ്യാപിച്ച ഉടനെയാണ് ഫഌപ്പ്കാര്ട്ട് അവരുടെ ഓഫര് സെയിലുമായി രംഗത്ത് വന്നത്. ജനുവരി 21ന് ആരംഭിച്ച് 23 നാണ് റിപബ്ലിക് ദിന വില്പന ഫഌപ്പ്കാര്ട്ട് അവസാനിപ്പിക്കുക. ആമസോണ് 21 ന് തന്നെ ആരംഭിച്ച് 24ന് അവസാനിപ്പിക്കും.
ലാഭം കൊയ്യാന് ഏറ്റവും മികച്ച മാര്ഗമായ സ്മാര്ട്ട്ഫോണ് വിപണിക്ക് തന്നെയാണ് ഇത്തവണയും ഫഌപ്പ്കാര്ട്ട് മുന്തൂക്കം നല്കിയിരിക്കുന്നത്. ടി.വിയും ലാപ്ടോപും മറ്റ് ഇലക്ട്രോണിക് ഉപകരണങ്ങളും ഓഫര് വിലയില് വില്കും.
ഗൂഗിളിന്റെ പിക്സല് 2 എക്സല് സ്മാര്ട്ട് ഫോണ് 48999 രൂപക്ക് വാങ്ങാം. എച്ച്.ഡി.എഫ്.സി ക്രെഡിറ്റ് കാര്ഡ് ഉപയോഗിക്കുന്നവര്ക്ക് 10000 രൂപയുടെ ഡിസ്കൗണ്ടുമുണ്ട്. സാംസങ് ഗാലക്സി എസ് 7, 26990 രുപ, ഷവോമിയുടെ ഫ്ലാഗ്ഷിപ്പായ എം.ഐ മിക്സിന് 3000 രുപയുടെ എക്സേഞ്ച് ഡിസ്കൗണ്ട് ഉണ്ട്. 29999 രൂപയാണ് ഫോണിന്റെ വില. ഹുആവേയുടെ ഹോണര് 9 ലൈറ്റിനും ആകര്ഷകമായ ഓഫറുകളുണ്ട്.