അളക ഖാനം
ന്യൂഡല്‍ഹി: നോട്ട് അസാധുവാക്കല്‍ ഏറ്റവുമധികം ബാധിച്ചത് ദിവസവേതനക്കാരെ. 2017ലെ ആദ്യ മൂന്നുമാസങ്ങളില്‍ 53,000 തൊഴിലാളികള്‍ക്ക് ജോലി നഷ്ടമായി. തൊഴില്‍മന്ത്രാലയത്തിന് കീഴിലെ ലേബര്‍ ബ്യൂറോ നടത്തിയ അവസാന പാദ തൊഴില്‍ സര്‍വേ അനുസരിച്ചാണ് ഈ കണക്ക്. അതേസമയം ഉല്‍പാദനമേഖലയിലും ഐ.ടി മേഖലയിലും 1.85 ലക്ഷം തൊഴിലവസരങ്ങള്‍ വര്‍ധിക്കുകയാണുണ്ടായത്.
സ്ഥിരജോലിക്കാര്‍ 1.97 ലക്ഷവും കരാര്‍ ജോലിക്കാര്‍ 0.26 ലക്ഷവും വര്‍ധിച്ചു. വര്‍ധിച്ച 1.85 ലക്ഷം തൊഴിലവസരങ്ങളില്‍ 15,000 സ്വയംതൊഴില്‍ കണ്ടെത്തിയവരും 1.70 ലക്ഷം മറ്റ് തൊഴിലാളികളുമാണ്. വനിതാ തൊഴിലാളികള്‍ 59,000, പുരുഷതൊഴിലാളികള്‍ 1.26 ലക്ഷം എന്നിങ്ങനെയാണ് വര്‍ധന. എട്ടു തൊഴില്‍മേഖലകളെ കേന്ദ്രീകരിച്ചായിരുന്നു സര്‍വേ.
