കാഷ്‌ലെസ് ഇക്കോണമി പരാജയം

വിഷ്ണു പ്രതാപ്-
ന്യൂഡല്‍ഹി: നോട്ട് നിരോധനം പരാജയമെന്ന് തെളിയിച്ച് കണക്കുകള്‍. നോട്ട് നിരോധനത്തിന്റെപ്രധാന ലക്ഷ്യങ്ങളിലൊന്നായ പണരഹിത സമ്പദ്‌വ്യവസ്ഥ പരാജയപ്പെട്ടുവെന്ന് തെളിയിക്കുന്ന കണക്കുകളാണ് പുറത്ത് വന്നത്.
2019 മാര്‍ച്ച് 15ലെ കണക്കുകള്‍ പ്രകാരം ഇന്ത്യന്‍ സമ്പദ്‌വ്യവസ്ഥയില്‍ 21.47 ലക്ഷം കോടി രൂപയുടെ കറന്‍സിയാണ് നിലവിലുള്ളത്. നോട്ട് നിരോധനത്തിന് മുമ്പ് ഇത് 17.97 ലക്ഷം കോടി രൂപ മാത്രമായിരുന്നു. നോട്ട് നിരോധനത്തിന് ശേഷവും സമ്പദ്‌വ്യവസ്ഥയില്‍ വിനിമയത്തിലുള്ള കറന്‍സിയുടെ അളവ് കുറക്കാന്‍ കഴിഞ്ഞിട്ടില്ലെന്നാണ് ഇത് തെളിയിക്കുന്നത്. ഡിജിറ്റല്‍ സമ്പദ്‌വ്യവസ്ഥയെന്ന നോട്ട് നിരോധനത്തിന്റെ ലക്ഷ്യം പൂര്‍ണമായും പരാജയപ്പെട്ടുവെന്നത് ശരിവെക്കുന്നതാണ് ഇപ്പോള്‍ പുറത്ത് വന്ന കണക്കുകള്‍.
എന്നാല്‍, തെരഞ്ഞെടുപ്പ് കാലത്ത് പൊതുവില്‍ കറന്‍സിയുടെ ഉപയോഗം വര്‍ധിക്കാറുണ്ടെന്നാണ് ബാങ്കുകള്‍ വ്യക്തമാക്കുന്നത്. ഉല്‍സവകാല സീസണിലും കറന്‍സി ഉപയോഗം വര്‍ധിക്കുമെന്നും ഇവര്‍ വ്യക്തമാക്കുന്നു. അതേസമയം, രാജ്യത്തെ എ.ടി.എം കൗണ്ടറുകള്‍ വഴിയുള്ള ഇടപാടുകളും വര്‍ധിക്കുകയാണ്. 2016 നവംബറില്‍ പിന്‍വലിച്ച കറന്‍സികളില്‍ ഭൂരിപക്ഷവും തിരിച്ചെത്തിയെന്ന് ആര്‍.ബി.ഐ നേരത്തെ വ്യക്തമാക്കിയിരുന്നു. ഇതോടെ നോട്ട് നിരോധനം ലക്ഷ്യം കണ്ടില്ലെന്ന് വിമര്‍ശനമുയര്‍ന്നിരുന്നു.