അളക ഖാനം-
ലണ്ടന്: ബ്രക്സിറ്റ് ബ്രിട്ടനില് സാമ്പത്തിക പ്രതിസന്ധിയുണ്ടാക്കുമെന്ന് ബാങ്ക് ഓഫ് ഇംഗ്ലണ്ടിന്റെ മുന്നറിയിപ്പ്. 2007ലുണ്ടായ സാമ്പത്തിക മാന്ദ്യത്തെക്കാളും വലിയ പ്രതിസന്ധിയായിരിക്കും ബ്രിട്ടനെ കാത്തിരിക്കുന്നത്. യു.കെയുടെ സാമ്പത്തിക വളര്ച്ച നിരക്ക് എട്ട്് ശതമാനത്തിലേക്ക് താഴുമെന്നും മുന്നറിയിപ്പുണ്ട്.
ബ്രിട്ടീഷ് പൗണ്ടിന്റെ മൂല്യത്തിലും കുറവുണ്ടാകുമെന്നും ബാങ്ക് ഓഫ് ഇംഗ്ലണ്ട് പ്രവചിക്കുന്നുണ്ട്. 25 ശതമാനത്തന്റെ വരെ ഇടിവ് പൗണ്ടിലുണ്ടാവുമെന്നാണ് ബാങ്ക് വ്യക്തമാക്കുന്നത്. 2023ഓടെ സാമ്പത്തിക സ്ഥിതി മെച്ചപ്പെട്ടു വരുമെന്നാണ് പ്രവചനം.
ബ്രക്സിറ്റ് നടപ്പിലായാല് ലോക വ്യാപാര സംഘടനയുടെ നിയമങ്ങള്ക്ക് അനുസൃതമായാവും ബ്രിട്ടന് പ്രവര്ത്തിക്കുക. 2022 വരെ പുതിയ വ്യാപാര കരാറുകളിലൊന്നും ബ്രിട്ടന് ഏര്പ്പെടില്ല. യുറോപ്യന് രാജ്യങ്ങളുമായുള്ള വ്യാപാര കരാറുകളെല്ലാം റദ്ദാവും. ഇതെല്ലാം ബ്രിട്ടന് തിരിച്ചടിയാവുമെന്നാണ് വിലയിരുത്തപ്പെടുന്നത്.