വിഷ്ണു പ്രതാപ്
മുംബൈ: രാജ്യത്തെ പ്രമുഖ ഗൂഢ കറന്സി എക്സ്ചേഞ്ച് ആയ കോയിന് സെക്യുറില് 19 കോടി രൂപ വിലയുള്ള ബിറ്റ്കോയിന് മോഷണം. 438 ബിറ്റ്കോയിനുകളാണു കവര്ന്നത്. കമ്പനിയിലെ ചീഫ് സയന്റിഫിക് ഓഫീസര് ഡോ. അമിതാഭ് സക്സേനയെ സംശയിക്കുന്നതായി കാണിച്ചു കമ്പനി പോലീസില് പരാതി നല്കി. സക്സേന രാജ്യം വിട്ടുപോകാതിരിക്കാന് പാസ്പോര്ട്ട് കണ്ടുകെട്ടണമെന്നും ആവശ്യപ്പെട്ടു.
ഇടപാടുകാരുടെ പണം തിരിച്ചെടുക്കാന് എല്ലാ ശ്രമവും നടത്തിവരികയാണെന്ന് കോയിന് സെക്യുര് ഇടപാടുകാരെ അറിയിച്ചു. ഇടപാടുകാര്ക്കു ബിറ്റ്കോയിന് ഗോള്ഡ് വിതരണം ചെയ്യാന് ശ്രമിച്ചപ്പോഴാണ് നഷ്ടം ശ്രദ്ധയില്പ്പെട്ടതത്രെ.
കംപ്യൂട്ടര് പ്രോഗ്രാമില് അധിഷ്ഠിതമാണു ബിറ്റ്കോയിന് പോലുള്ള ഗൂഢ കറന്സികള്. നിശ്ചിത സംഖ്യ ബിറ്റ് കോയിനുകളേ ഉണ്ടാക്കാനാവൂ. ഈ ദൗര്ലഭ്യമാണ് അവക്കു വില ഉണ്ടാക്കുന്നത്.