അളകാ ഖാനം-
കലിഫോര്ണിയ: മൈക്രോസോഫ്റ്റ് സഹസ്ഥാപകനും ശതകോടീശ്വരനുമായ ബില്ഗേറ്റ്സ് തന്റെ സമ്പാദ്യം മുഴുവന് ദാനം ചെയ്യാനൊരുങ്ങുന്നു.
സന്നദ്ധ പ്രവര്ത്തനങ്ങള്ക്കായി, മുന്ഭാര്യ മെലിന്ഡ ഫ്രെഞ്ചുമായി ചേര്ന്ന് 2000ല് ആരംഭിച്ച ഗേറ്റ്സ് ഫൗണ്ടേഷനിലേക്കു തന്റെ സമ്പത്ത് മുഴുവന് നല്കുമെന്നാണു ബില്ഗേറ്റ്സ് ബ്ലോഗ്പോസ്റ്റിലൂടെ അറിയിച്ചിരിക്കുന്നത്.
ലോകത്തിലെ അതിസമ്പന്നരുടെ പട്ടികയില് കാലക്രമേണ പിന്നോട്ടുപോയി ഒടുവില് അതില്നിന്നു പുറത്തുകടക്കുകയാണു ലക്ഷ്യമെന്നും ഗേറ്റ്സ് അറിയിച്ചു. നേരത്തെ 2010 ലും ബില്ഗേറ്റ്സ് തന്റെ സമ്പത്ത് മുഴുവന് സന്നദ്ധപ്രവര്ത്തനങ്ങള്ക്കായി നല്കുമെന്ന് പ്രഖ്യാപിച്ചിരുന്നു.
‘കോവിഡ്, റഷ്യ യുക്രെയ്ന് യുദ്ധം തുടങ്ങിയ സാഹചര്യങ്ങള് പരിഗണിച്ച് ഗേറ്റ്സ് ഫൗണ്ടേഷനിലേക്ക് ഉടന്തന്നെ 2000 കോടി ഡോളര് നല്കും. ഫൗണ്ടേഷന്റെ ധനവിനിയോഗം 2026 ഓടെ പ്രതിവര്ഷം 900 കോടി ഡോളറായി വര്ധിപ്പിക്കും.
സമൂഹത്തിലെ കഷ്ടതകള് കുറയ്ക്കുന്നതിനും ജീവിത നിലവാരം മെച്ചപ്പെടുത്തുന്നതിനുമായി എന്റെ വിഭവങ്ങളെല്ലാം നല്കുകയെന്നത് എന്റെ ബാധ്യതയാണെന്ന് ബില്ഗേറ്റ്സ് പറഞ്ഞു.